DILI, 15 Jullu 2025 (TATOLI) – Ministériu Agrikultura, Pekuária, Peska no Floresta (MAPPF) no Organizasaun Nasaun Unida ba Edukasaun, Siénsia no Kultura (UNESCO, iha inglés) realiza sorumutu nasionál hodi introdús programa Man and the Biosphere (MAB) iha Timor-Leste atu kompleta rekizitu nomeasaun Parke Nasionál Nino Konis Santana ba iha lista UNESCO iha París.
Sekretáriu Estadu Peska, Fernandino Vieira, hateten enkontru ida-ne’e envolve administradór postu sira hotu iha Lautein, atu rekolla dadus no informasaun kona-ba biodiversidade mariña (tasi) hodi sustenta kandidatura Parke Nino Konis Santana hanesan rezerva biosfera ka MAB iha Timor-Leste.
Tuir governante, dadus ne’e importante tanba ekipa traballu interministeriál husi MAPPF, Turizmu no Ambiente (MTA), Obra Públika (MOP) hamutuk ho UNESCO forma komité ida hodi elabora estatutu Parke nasionál Nino Konis Santana, tuir rekezitu ofisiál husi UNESCO.
Ekipa traballu nia serbisu mak halo mapeamentu kona-ba área turístiku, kultura no sosioekonómia iha Parke Nino Konis Santana nia-laran. Parke ne’e iha rai ektare rihun 135, inklui parte mariña no terrestre, ne’ebé iha sítiu barak mak presiza promove.
“Agora serbisu sira ne’e atinje ona 99% para finaliza. Sorumutu ohin atu fahe informasaun ba malu hodi kompleta dadus sira ne’ebé iha, nune’e tama iha Setembru tinan ne’e Governu Timor-Leste bele rejista ona Parke Nasional Nino Konis Santana iha UNESCO París”, Fernandino Vieira hateten iha salaun MAPPF, ohin.
Lembra katak iha 2008, Governu fó sai rezolusaun ida hodi define Parke Nino Konis Santana hanesan Parke Nasionál dahuluk iha Timor-Leste.
Atualmente, Governu kontinua hodi halo jestaun ba parke nian hodi proteje no conserva rekursu naturais, no bele benefisia komunidade sira ne’ebé moris iha laran parke nian.
Daudaun, Governu nafatin halo jestaun ba parke hodi proteje no konserva rekursu naturál, hodi bele benfisia komunidade sira ne’ebé moris iha parke nia laran.
Koordenador Programa UNESCO Timor-Leste, Adelina Lourdes, hateten husi parte UNESCO durante ne’e serbisu hamutuk ho MAPPF oinsá atu nomeia Parke Nino Konis Santana nu’udar rezerva biosfera Timor-Leste nian.
Tuir nia, rekezitu ne’ebé Governu presiza prienxe mak dokumentu ida bolu “dossier”, ne’ebé inklui dadus kona-ba área mariña, terrestre, komunidade lokál, lala’ok kultura sira iha Lautein.
Notisía relevante: SEF-UNESCO forma komité hodi elabora estatutu parke Nino Konis Santana
Jornalista: Arminda Fonseca
Editora: Maria Auxiliadora
