MOP sei halo pra-kualifikasaun ba kompañia nasionál sira

DILI, 15 Jullu 2025 (TATOLI)–Ministru Obra Públika (MOP), Samuel Marcal, hateten, sira sei halo pra-kualifikasaun ba kompañia sira hodi haree daudaun ona setór privadu sira-nia kapasidade, katak sé mak bele kaer konkursu públiku ho montante $1000 ba leten no sé mak bele kaer projetu ho montante $1000 mai kraik.

Ministru Obra Públika, Samuel Marçal, hateten minsitériu tenke halo klasifikasaun para kompañia hotu labele hadau malu de’it, maibé lahatene kaer projetu ba faan tutan hotu ba ema seluk mak jere projetu liuliu ema estranjeiru, entaun timoroan sira rasik mak lakohi buka aprende.

“Nune’e ita tenke halo pra-kualifikasaun atu hili tuir sira-nia kapasidade, para sira mak ka’er ka jere rasik projetu hodi aprende labele hein buat hotu-hotu faan de’it ba ema seluk, ita hein de’it pursentu, ne’e lae. Entaun, ita la eduka ita-nia povu atu aprende buat barak,” nia hateten ba jornalista sira iha nia kna’ar fatin, Kaikoli, ohin.

Ministru informa, kritéria lubuk ida mak kompañia sira tenke prienxe no sei fahe tuir kategória klasifikasaun ida-idak, hanesan klasifikasaun A ne’e kritéria ketak ida no klasifikasaun B mós iha ninia kritéria ketak, ne’ebé hotu-hotu iha ninia kriteria, enkuantu kompañia ne’ebé mak prienxe kritéria, ida-ne’e mak bele hetan sertifikadu.

“Depois kada tinan ita sei halo fali avaliasaun ba kompañia sira hodi hakat faze ida ba faze seluk. Katak, husi kategória B sa’e ba kategória A ne’e tinan-tinan ita sei halo avaliasaun,” nia esplika.

Durante implementasaun servisu kompañia nian iha terrenu, sei akompañia mós husi ekipa téknika Ministéria Obra Públika nian hodi eduka sira halo jestaun manejementu ne’ebé di’ak tanba setór privadu nasionál ne’e importante tebes atu kaer metin ekonómia rai laran nian.

Jornalista : Alexandra da Costa

Editór       : Cancio Ximenes