DILI, 18 Jullu 2025 (TATOLI)-Governu deside sosa konstrusaun uma ne’ebé empreza Jackson Internasionál konstrui besik edifísiu Ministeriu Interiór, nune’e sai Instalasaun ba edifísiu Servisu Migrasaun.
Prosesu ne’e akontese hafoin na’in ba empreza Jackason Internasionál, Jackson Lay, konkorda fa’an ba Ministériu Interiór hodi utiliza futuru instalasaun edifísiu Servisu Migrasaun.
Ministeriu Interiór halo koordenasaun ho Terras Propriedade Ministeriu Justisa, Obras Públika (MOP), Ministru Planeamentu Investimentu Estratéjiku (MPIE) no Advogadu Privadu empreza Jackson Lay hodi solusiona.
“Momentu ne’e dadersan ida Primeiru Ministru, Maun boot Kay Rala Xanana Gusmão, mai vizita iha ne’e, ami rua hamrik, nia husu ba ha’u katak edifísiu ne’e sé nia, entaun ha’u hatán katak empreza ida nian, se bele kontaktu ba Ministru Gastão, rezolve ida-ne’e. Nune’e mak husi MOP, IDN no Sekretáriu Grande Projetu hamutuk empreza no nia advogadu hahú diskusaun, nune’e ba Estadu interese, empreza hakarak no ohin ita halo simbolu entrega rai no konstrusaun ne’e mai Governu hodi ba futuru uza hanesan edifísiu ba Servisu Imigrasaun nian”, Ministru Interiór, Francisco da Costa Guterres, hateten ba jornalista sira iha nia kna’ar fatin, sesta-ne’e.
Nia dehan, bazea ba levantamentu konstrusaun halo ho kustu $470-resin, nune’e governu devolve fali empreza nia kustu.
Nia dehan, fatin ne’e sei instala ekipamentu sira, nune’e bele kontrola ema sai no tama iha territóriu nasionál. Tanba ba oin Timor-Leste adere ona ba ASEAN entaun edifísiu ba Servisu Migrasaun ne’e importante.
Governante ne’e louva ba empreza no nia advogadu privadu, Pedro Aparicio, ne’ebé hatudu sentidu Estadu hodi koopera, nune’e bele fó susesu ba kompra no venda.
Jornalista : Natalino Costa
Editora : Rita Almeida
