DILI, 20 Jullu 2025 (TATOLI) – Ekipa futeból Angola rekolla pontu tolu husi selesaun nasionál Kabuverde iha kontinuasaun faze grupu jogu desportu Komunidade Nasaun Lian Portugés (CPLP, sigla Portugés), iha Estádiu Munisipál Dili.
Ekipa rua husi nasaun kontinente Áfrika referida loke jogu iha primeiru volta kontra atake ba malu, iha-ne’ebé maioria uza liu fíziku, jogadór sira halo atake husi parte karuk no loos hodi to’o rezulta tabela eskore 0-0 iha volta dahuluk.
Jogu volta daruak, Ekipa Angola hahú inisia atake ba liña defeza Kabuverde, esforsu ne’ebé halo hodi rezulta golu dahuluk ba ekipa Angola ne’ebé jogadór Pedro António (15) ba konsege hatama golu iha menitu 44′.
Hafoin lidera jogu, ekipa Angola kontinua hatudu jogu ho atrativu, nune’e mos husi Kabuverde, ekipa rua kontinua hatudu jogu kontra atake maibé Angola hadook liután esperansa Kabuverde nian hodi aumenta golu 2-0 liuhusi jogadór Manuel Pires (11) menitu 64.
Maske Kabuverde hasa’e ritmu jogu maibé Angola hahú hametin área defeza to’o árbitru naruk sinál hapara jogu no rezultadu ikus Angola gaña pontu tolu jogu daruak iha futeból CPLP.
Entertantu, husi rezultadu jogu futeból referida, Angola lidera iha tabele klasifikasaun ho pontu tolu, tuir kedas Portugál pontu 3, Timor-Leste pontu 0 no Kabuverde 0.
Jornalista : Natalino Belo
Editór : Evaristo Soares Martins
