FSCJ Maliana organiza eventu Demana Arte no Desportu
BOBONARU, 21 Jullu 2025 (TATOLI)–Fundasaun Sagradu Korasaun Jezús (FSCJ-sigla portugeza) Maliana, segunda ne’e, halo abertura ba eventu Semana Arte no Desportu nivel Ensinu Báziku Sentrál (EBC-sigla portugeza) Katólika hodi komemora ezisténsia Dioseze Maliana ba dala-15 no ezisténsia Koléjiu Infante de Sagres Maliana ba dala-77.
Atividade ne’e realiza ba EBC Katólika hirak-ne’ebé hamahan-aan iha FSCJ Dioseze Maliana hanesan Ensinu Báziku (EBC) Sagradu Korasaun Jezús, EBC Pé. Manuel Luís, EBC Aidabaslala, EBC Arnold Jassen Atabae, EBC João Paulo II Maubara, EBC São João de Brito Likisá, EBC São Luís Gonzaga Suai no EBC Fohorem.
Prezidente FSCJ, Pé Norberto da Conceição Soares esplika atividade arte no desportu ne’ebé realiza iha eventu ne’e mak hanesan jogu modalidade futsál feto ho mane, sertame, koru no solo-vokál.
“Ita halo atividade ida-ne’e ninia esperansa lori labarik sira koñese malu no mós liuhusi jogu ne’e atubele kria espíritu karater,” Atuál Diretór Eskola Koléjiu Infante de Sagres Maliana, Pé Norberto da Conceição Soares ba jornalista sira iha nia kna’ar fatin, Segunda ne’e.
Iha biban ne’e, Sekretáriu Autoridade Munisípiu Bobonaru ba Asuntu Sosál no Organizasaun Komunitária, Júlio Carvalho Caeiro, sente orgullu no hato’o apresiasaun ba FSCJ tanba bele iha inisiativa di’ak organiza eventu ne’e.
Caeiro konsidera liuhusi atividade ne’e aleinde kria amizade entre estudante sira, bele mós identifika no prepara atleta di’ak hodi reprezenta Munisípiu Bobonaru, Likisá no Kovalima atu partisipa iha eventu desportu nasionál no rejionál.
Eventu ne’e hetan apoia asisténsia médika husi Sentru Saúde Maliana no apoia seguransa husi Komandu Munisípiu Polísia Bobonaru.
Jornalista: Sergio da Cruz
Editór: Xisto Freitas da Piedade
