FXTL-Nasaun partisipante konkorda muda oráriu Xadrez iha jogu desportivu CPLP
DILI, 21 Jullu 2025 (TATOLI)– Federasaun Xadrez Timor-Leste (FXTL) hamutuk ho Reprezentante Nasaun Partisipante lima seluk konkorda muda oráriu Xadrez nian iha Jogu Desportivu CPLP hafoin remata enkontru tékniku modalide xadrez nian.
Prezidente Federasaun Xadrez Timor-Leste (FXTL), Zeferino Viegas, afirma rezultadu prinsipál ida hosi enkontru ne’e maka ajustamentu ba oráriu jogu nian. Iha inísiu, torneiu xadrez ne’e tuir planu sei hala’o hahú 22 – 25 Jullu, tuir kalendáriu ne’ebé fó sai ofisialmente husi komisaun organizadora ba Jogu Desportivu CPLP.
Maibé, konsidera katak husi kategoria jogu tolu sei joga dala lima hosi jogadór sira ne’ebé hanesan, partisipante sira konkorda atu arranja fali oráriu hodi hamenus kolen ba atleta sira.
“Nune’e hodi la bele fo todan demais ba Jogador sira, ikus mai konkorda iha manual ne’ebé mak ita ajusta hodi bele Joga ohin. Orsida loraik sei iha jogu abertura iha tuku 3 lorokraik (15:00). Ita sei hahu uluk ho kategoria Standar ba Femeninu no Maskulinu.” dehan Zeferino iha Sentru Konvensaun Dili, segunda ne’e.
Alende ne’e koalia mós detallu kona-ba regulamentu ne’ebé distribui ona ba nasaun partisipante sira inklui konfirma naran atleta sira ne’ebé sei kompete hamutuk 14 husi nasaun neen (6) hanesan Portugal, Angola, Cabo Verde, São Tomé Principe, Mosambike inklui Timor-Leste.
“Ami diskute ona kona-ba regulamentu no komunika ona ba nasaun sira ne’ebé partisipa. Ohin, hala’o mós sorteiu ba jogadór sira ne’ebé sei kompete iha kategoria jogu tolu, Standar (Klasiku), Rápidu no Blitz”, deklara Nia.
Regra Xadrez iha Jogu Desportivu CPLP ba ketegiria tolu ne’e fahe ba Rapid (Rápidu) ho durasaun minutu 15, Blitz ho durasaun minutu liman no standar mak minute 60/ oras ida.
Nia esplika, ba jogu ne’e rasik FXTL prepara ona árbitru na’in sia (09) no hetan apoiu tan árbitru nain haat (04) hosi Portugal, Cabo Verde, no Angola. Sira sei serbisu kolaborativamente hosi 21 – 25 Jullu inklui ba serimónia medalla nian.
Fasilidade ba jogu xadrez rasik hetan apoiu tomak husi Federasaun Xadrez Internasionál (FIDE), iha kolaborasaun ho FXTL no Federasaun Xadrez Cabo Verde. Apoiu ne’e inklui fornesimentu ekipamentu xadrez konjuntu (set) 10, ne’ebé sei rai iha Timor-Leste hodi uza iha kompetisaun sira iha futuru.
Hafoin ekontru tékniku ekipa prepara kedas fatin jogu nian ho meza neen (6), kada meza iha ona set ida ho kadera tolu ne’ebé sei priense husi jogador no arbitrazen. Durante jogu sei la autoriza pessoal hotu halo movimentu nune’e partisipante sira bele iha konsentrasaun masímu.
Jornalista: Cidalia Fátima
Editor; Florencio Miranda Ximenes
