FATL husu Governu kontinua investe ba atletismu
DILI, 24 Jullu 2025 (TATOLI)-Prezidente Federasaun Atletismu Timor-Leste (FATL), Afranio Xavier, hateten Governu tenke kontinua investe ba atleta sira iha modalidade atletismu, ne’ebé konsege rekolla medalla osan-metan (bronze) iha jogu desportivu Komunidade Nasaun sira ne’ebé ko’alia lian-portugés (CPLP, sigla portugés).
Prezidente FATL hatete kuandu Governu la kontinua investimentu, promosaun ba melloramentu talenta husi atleta sira difísil atu akontese.
“Atleta sira-ne’ebé konkista jogu desportivu CPLP, barak liu mak maihusi munisípiu, nune’e bainhira kompetisaun ne’e ramata sira mós labele kontinua sira-nia talentu iha desportivu”, dehan nia ba jornalista sira.
Nia hatutan, entaun sira-nia performe antes ne’e kompetitivu tebes, dalaruma bele tuun tanba ladún hetan treinu ne’ebé mak másimu husi treinadór sira no ida-ne’e abandona ona atleta sira.
“Nune’e Governu presiza fasilita formasaun profisionál ba ita-nia atleta sira, konvida treinadór ne’ebé di’ak husi nasaun seluk hodi mai hanorin atleta timoroan, liuliu iha modalidade atletismu”, katak nia
Aleinde ne’e treinador ne’ebé mak Governu sei delega mai ne’e tenke iha sertifikadu prifisionál ba atletismu nian, nune’e nia bele hanorin tuir esperénsia ne’ebé mak iha, la’ós foti ema bazeia ba nia hatene ko’alia língua, maibé oinsá foti treinadór haree tuir ninia esperénsia iha área desportu nian.
“La presiza lori ita-nia atleta ba rai li’ur, maibé oinsá mak iha estratéjia hodi lori treinadór ruma husi nasaun seluk mak mai, aleinde ne’e mós Governu tenke kria enkontru anuál ho federasaun sira hodi hatene kona-ba sira-nia planu no programa”, nia sujere.
Enkuantu seluk mak Governu tenke kria turneiu semanál ka anuál ruma ba atleta atletismu sira, hodi treinu beibeik sira, se ita hotu garante mak futeból ne’e tanba sira treinu loro-loron maibé kona-ba atletismu, bainhira iha kompetisaun internasionál ka turneiu nasionál ruma mak foin kompete. Ida-ne’e mós hanesan difikuldade hodi promove atleta sira.
Kompetisaun atletismu
Ho derota iha kompetisaun atletismu, Afranio konsidera lakon ne’ebé atleta sira simu tanba kondisaun fízika. “Ema nia atleta mai mesak altura de’it, enkuantu ita-nia atleta mesak ki’ik, entaun ida-ne’e mós sai hanesan difikuldade mai-ita no mós tanba sira treinadu loro-loron iha akademia, enkuantu ita hein to’o iha kompetisaun foin treinu”, dehan nia.
Razaun seluk nia dehan la kumpre kompromisu sobre idade atleta sira. Prova lansamentu pesu feto nian antes ne’e tenke ho idade-16 anos, maibé delegasaun seluk nian mai balun to’o idade-17. “Lolos ne’e tenke koloka tuir kritéria federasaun nian, la’ós mai kahur fali”.
Tuir nia, realizasaun kompetisaun internasionál ne’e la’ós asesór sira mak organiza maibé loloos ne’e federasaun, nune’e bele halo estimulasaun kategoria ho di’ak.
Maske nune’e, nia kongratula Governu liuhusi Ministériu Juventude Desportu (MJDAK) ne’ebé ajuda konfederasaun sira hotu hodi garante buat hotu la’o ho di’ak no laiha protesta ruma husi delegasaun membru CPLP sira.
Notísia relevante: Portugál no Kabuverde kontinua lidera prova haat iha modalidade atletismu
Jornalista : Alexandra da Costa
Editora : Rita Almeida
