Suku Buruma sei konstrui kampu multifunsaun iha tinan ne’e
DILI, 24 Jullu 2025 (TATOLI)—Autoridade Suku Buruma, Postu Administrativu Baukau Vila, Munisípiu Baukau sei konstrui kampu multifunsaun liuhosi orsamentu Programa Nasionál Dezenvolvimentu Suku (PNDS) síklu VII iha tinan ne’e.
Xefe Suku Buruma, Libório dos Santos Freitas esplika planu referidu hato’o husi juventude suku no aprova liuhosi Reuniaun Konsellu Suku inklui kontinua hetan apresiasaun iha Asembleia Postu Administrativu nune’e atualmente sei hein ekipa téknika atu halo levantamentu dadus antes hahú konstrusaun.
“Ami sei prioriza konstrui kampu multifunsaun ba joven sira iha fatin públiku nune’e utiliza ba atividde desportu,” Xefe Suku Buruma informa ba TATOLI liuhosi telefónema, Kinta ne’e.
Libório esplika katak mezmu la tuir menu indikadór maibé programa regulár konstrusaun kampu multifunsaun ne’e hetan aseitasaun husi Autoridade Administrasaun Munisipál (AAM) tanba fasilita joven sira halo atividade desportiva iha suku.
Tuir planu, kampu multifunsaun referida sei akumula modalidade desportu tolu hanesan volei, basket no futsál ne’ebé sei konstrui iha arredór sede suku ho alokasaun orsamentu ba tinan ne’e hamutuk rihun $40-resin.
“Ami sei hein karta aseitasaun husi Prezidente Autoridade Munisipál nune’e tékniku sira hahú levantamentu dadus antes konstrui,” Libório Freitas akresenta.
Suku Buruma hamutuk aldeia haat kompostu husi Tasi, Suli-Ua, Kasamutu no Ono-Sere ho totál populasaun hamutuk 3.245.
Jornalista: Natalino Belo
Editór: Xisto Freitas da Piedade
