Xanana relata rezultadu vizita ofisiál Singapura ba Ramos Horta
DILI, 24 Jullu 2025 (TATOLI) — Primeiru Ministru (PM), Kay Rala Xanana Gusmao, kinta ne’e hasoru malu ho Prezidente Repúblika, José Ramos Horta hodi hato’o rezultadu vizita ofisiál ba Singapura.
Primeiru-Ministru dehan, Singapura iha ona prontidaun apoia formasaun profisionál ba timoroan sira iha área oioin.
“Durante enkontru ohin nian, ha’u informa ba Prezidente kona-ba ha’u-nia vizita ba Singapura. Prezidente nia opiniaun fó apoiu,” Primeiru-Ministru hateten ba jornalista sira hafoin reuniaun ho Xefe Estadu, iha Palásiu Prezidensiál.
Asuntu ba Singapura, Primeiru-Ministru sei aprezenta ba reuniaun Konsellu Ministru, inklui haruka ministru sira ba partisipa formasaun profisionál iha Singapura durante semana ida to’o semana rua.
“Ha’u sei ko’alia kona-ba asuntu ne’e iha reuniaun Konsellu Ministru nian. Karik bele, hahú ho ministru oinoin iha ministériu sira-ne’ebé bele serbisu maibé laiha kbiit atu halo análize krítiku, sira bele partisipa iha formasaun semana ida to’o tolu iha Singapura.
Ne’e sai hanesan lembransa ba importánsia hodi haree fali ita-nia hahalok, tanba ida-ne’e bele hadi’a,” nia esplika.
Iha sorumutu ne’e, Primeiru-Ministru Singapura hato’o nia apoia maka’as ba kapasitasaun Timor-Leste nian liuhusi fó formasaun profisionál ba traballadór públiku sira iha Singapura.
Jornalista: Hortencio Sanchez
Editór: Evaristo Soares Martins
