Se tenke mate duni, reziste uluk molok mate

BAUKAU, 27 Jullu 2025 (TATOLI)—Moris no mate ne’e Maromak nia vontade. Maibé, se tenke mate duni, maizumenus reziste uluk molok mate. Filozofia ida-ne’e dezafiante tebes. Motiva asua’in ida-ne’e la ta’uk risku. Risku ba nia apenas risku.

Nia konsidera risku hanesan odamatan maibé la’ós parede. Sei iha naroman (esperansa) ba nia luta. Ba nia, esperansa sei nakfilak ba resposta bainhira hamaluk ho luta. Tanba ne’e, iha tempu difísil ka baze-apoiu rahun iha-ne’ebé lori ema barak lakon esperansa ba libertasaun, nia la nakadoko. Ninia prinsípiu metin nafatin atu luta bá-oin. Luta liuhusi atividade klandestina iha presaun invazór nia leet.

Notísia relevante: Lansadu primeira pedra monumentu Saudozu “Naroman” no “Onda”

Maski la sobresai, maibé temi Kaixa-Klandestina Vivake/Inglaterra no Bika, ema koñese nia. Ninia naran Jerónimo Americo Xavier no koñesidu ho naran revolusionáriu “Naroman”. Nia estafeta ida husi estafeta sira seluk husi Sub-Xefe Estadu Maiór FALINTIL, David Alex “Daitula” iha dékada 80 to’o funu ramata. Husi saudozu ne’e, bele harii Kaixa-Klandestina iha Uaimanuboe no buras iha Uailili no Gariuai iha Zona Fatumaka.

Jornalista: Osória Marques

Editór: Xisto Freitas da Piedade