DILI, 29 Jullu 2025 (TATOLI)—Prezidente Repúblika, José Ramos Horta, tersa ne’e, iha Palásiu Prezidensiál, simu delegasaun husi Fundasaun ba Dezenvolvimentu Pós-Konflitu (FPCD, sigla portugés), Muriel Bubbio, organizasaun ida-ne’ebé iha apoiu direitu husi Sua Alteza Sereníssima Príncipe Alberto husi Mónaku no husu atu reafirma kompromisu parseria ba dezenvolvimentu.
“Delegasaun ne’e espresa solidariedade ba povu Timor-Leste no aprezenta objetivu sira husi fundasaun, foka liu atu hametin lasu amizade sira, rona prioridade komunidade nian, no aprende husi lideransa Timor-Leste atu bele adapta di’ak programa apoiu ne’ebé implementa iha rai laran,” Muriel hateten hafoin remata reuniaun ho Xefe Estadu.
Iha okaziaun ne’e, Prezidente Ramos Horta rekoñese fundasaun nia apoiu ne’ebé boot tebes no kleur ona, ne’ebé akontese durante dékada rua ona, destaka importánsia husi ninia kontribuisaun ba progresu nasionál.
Prezidente enkoraja FPCD atu kontinua ninia serbisu importante sira-ne’ebé aliña ho meta dezenvolvimentu nasaun nian.
Iha enkontru ne’ebé hala’o ho espítitu diálogu abertu no konstrutivu, Xefe Estadu partilla ninia prioridade prinsipál sira durante mandatu, hodi promove kooperasaun ida-ne’ebé efikás no sentrada iha nesesidade reál husi komunidade timoroan sira.
Enkontru remata ho kompromisu kolektivu atu loke dalan ba parseria ne’ebé luan liu iha futuru entre Timor-Leste no FPCD.
Sorumutu ne’e destaka mós vizita husi fundasaun iha tempu oin mai ba maternidade iha Oekusi hanesan ezemplu konkretu husi nia kompromisu kontinuidade.
Kooperasaun ne’e subliña vizaun partilladu kona-ba dezenvolvimentu sustentável no hadi’a moris di’ak ba povu Timor-Leste.
Jornalista : Hortencio Sanchez
Editór : Cancio Ximenes
