KOVALIMA ,01 Agostu 2025 (TATOLI)- Xefe Departamentu Asaun Sosiál, Francisca Duarte Guterres, relata hahú Janeiru to’o Juñu 2025, Servisu Munisipál Asaun Sosiál munisipál Kovalima apoia ona kaixaun 95 ba família vulnerável sira.
“Durante ne’e ami halo atendementu hodi fó apoia kaixasaun ne’ebé hahú Janeiru to’o Jullu ne’e kaixaun hamutuk 95 ba família vulnerável sira ne’ebé mak submete pedidu ba Servisu Munisípiu Asaun Sosiál “, Xefe Departamentu ne’e informa ba jornalista sira iha Bairru Kosta, ohin.
Kritériu atu fó apoia kaixasaun família matebian presiza lori kartaun eleitorál foto-kopia husi matebian no husi família rasik lori deklarasaun husi xefe suku sira.
Kaixaun ne’ebé mak fó apoia ho nia medida sira hanesan boot ho nia presu $170, medida nato’on $95.00 no medida ki’ik $60.00
Ho nune’e durante trimesterál ba daruak ne’e apoia kaixaun ho medida boot 67, nato’on haat no ki’ik hamutuk 24.
Orsamentu ne’ebé mak SMAS gasta atu sosa kaixaun hahú husi Janeiru to’o Juñu ne’e hamutuk $13,210.00 husi orsamentu ne’e iha trimestre ba dahukuk gasta ona osan $7,015.00 no trimestre ba daruak gasta ona osan hamutuk $6,195.000
Orsamentu Jerál Estadu 2025 ne’e aloka atu sosa kaixaun hodi fó apoia ba família vulnerável sira hamutuk $50.000.00 husi orsamentu ne’e gasta ona osan $13,210.00, saldo sei iha $36.790.00 maibé la inklui orsamentu husi fulan-Jullu ni’an.
Jornalista: Celestina Teles
Editór : Florencio Miranda Ximenes
