Uma-kain 146 iha Leber asesu ona enérjia elétrika
BOBONARU, 31 Jullu 2025 (TATOLI)—Eletricidade de Timor-Leste, Empreza Públika (EDTL, E.P.) liuhusi téknika distribuisaun Munisípiu Bobonaru, Sesta semana kotuk ne’e, halo commissioning test ba transformadór ho kapasidade 50kVA unidade ida (1) no provizoriamente halakan ona enérjia elétrika ba komunidade uma-kain 146 husi Aldeia Mabelis no Leber-Taz, Suku Leber, Postu Administrativu Bobonaru ne’ebé implementadu liuhusi Projetu Eletrifikasaun Nasionál (PEN).
Xefe Suku Leber, Arnaldo de Jesus haktuir katak provizoriamente aldeia rua hansaan Mabelis no Leber-Taz mak fo’in asesu enérjia elétrika, falta aldeia rua hanesan Holsa-Taz ne’ebé iha hela faze instalsaun kabu no Aldeia Holbese foin iha faze mobilizasaun materiál tanba implementa liuhusi PEK.
“Leber-Taz ho Mabelis benefisiáriu ne’ebé asesu ona eletrisidade ho totál uma-kain 146, Aldeia Holsa sei halo hela instalasaun hosi tékniku sira no depois Holbese besi riin ho fiu tula mai tiha ona maibé hosi ekipa téknika EDTL agora daudaun sei iha Aldeia Odelgomo no depoiz sira sei mai Aldeia Laho, Suku Ai-assa hotu tiha, ida-ne’e mak sira sei mai dada liña eletrisidade iha Aldeia holbese,” nia informa ba jornalista TATOLI iha nia kna’ar fatin, Kinta ne’e.
Aleinde ne’e, Administradór Postu Administrativu Bobonaru,Tomás Barreto Henriques agradese ba Governu tanba lori ona naroman ba komunidade Suku Leber inklui aldeia sira seluk iha suku Ai-Asa no Suku Ilat-laun.
“Tinan barak povu iha fatin referidu la asessu liña eletrisidade maibé hahú ohin sira la halerik no laiha separasaun ho suku sira seluk tanba naroman ida-ne’e sira mós sente ona ka valór husi independénsia ita sente ona,” nia haktuir.
Enkuantu, antes ne’e, Aldeia Buchuk iha suku referidu ho totál uma-kain 60 resin mak asesu uluk enérjia elétrika iha tinan 2013 tanba lokalizadu besik liña jerál.
Jornalista: Sergio da Cruz
Editór: Xisto Freitas da Piedade
