Governu aluga edifísiu privadu atu insentiva setór privadu
DILI, 05 Agostu 2025 (TATOLI)–Ministra Finansa, Santina Viegas Cardoso, hateten, razaun ministériu no entidade Estadu aluga edifísiu privadu ne’e atu fó insentivu ba setór privadu sira nune’e bele hetan rendimentu husi investimentu.
“Bainhira edifísiu públiku sira ne’e la konsege akomoda funsionáriu, sira tenke aluga edifísiu privadu sira iha rai-laran,” Ministra hato’o ba jornalista sira iha Auditóriu Ministériu Finansa, Aitarak-Laran, Tersa ne’e.
Ministra ko’alia asuntu ne’e relasiona ho informasaun ne’ebé sirkula katak ministériu no institutu Estadu balun aluga edifísiu privadu sai eskritóriu iha tendénsia ba implikasaun aumentu ba orsamentu Estadu.
Govenante ne’e dehan, estrutura Governu kuandu aumenta ema no diresaun presiza espasu presiza espasu.
Tuir Santina bainhira aluga edifísiu ruma, Governu tenke hasai osan hodi aluga no kuandu sein aluger tenke aloka orsamentu atu halo edifísiu foun ba ministériu ka entidade relevante.
“Tanba ne’e mak presiza halo analiza hodi bele halo jestaun tuir nesesidade ne’ebé ministériu ka instituisaun presiza,” nia subliña.
Notísia relevante : Governu introdús kadeia valór kafé ba promosaun no insentiva produsaun nasionál
Ministra seidauk iha dadus kona-ba Governu halo gastu hira tanba presiza halo análiza kle’an.
“Ami seidauk halo analiza kle’an ba gasta aluger edifísiu privadu. Ami bele iha dadus ida kona-ba aluger ne’e, maibé ha’u hanoin Governu tenta iha opsaun rua. Kuandu ita aluger ba tempu badak, orsamentu uitoan liu, más kuandu ita hakarak halo konstrusaun ba ministériu idak-idak nian, ne’e ita tenke aloka kedas orsamentu barak iha tinan sira-ne’e. Entaun, ida-ne’e tetu sira-ne’e ita tenke toma konsiderasaun antes foti desizaun,” nia argumenta.
Ministra esplika, antigu edifísiu Ministériu Finansa iha Palásiu Governu daudaun ne’e Parlamentu Nasionál mak foti hodi espande tan edifísiu.
Kona-ba edifísiu Casa Europeia hanesan edifísiu públiku ne’ebé tuan liu ona no istóriku, entaun tenke iha dezeñu ne’ebé apropriadu atubele mantein nafatin valór istóriku dezde tempu portugés.
Jornalista : Osória Marques
Editora : Julia Chatarina
