Prezidente Ramos-Horta no Ministra Anne Aly diskute kona-ba dezenvolvimentu partilladu

DILI, 06 Agostu 2025 (TATOLI)—Prezidente Repúblika (PR), José Ramos-Horta hasoru malu ho Ministra Dezenvolvimentu Internasionál Austrália, Anne Aly MP, hodi ko’alia kona-ba dezenvolvimentu partilladu kolaborasaun ekonómiku iha ámbitu Timor-Leste nia adezaun ba Asosiasaun Nasaun Sudeste Aziátiku (ASEAN, sigla portugés).

“Enkontru ida-ne’e destaka parseria ne’ebé dura entre Timor-Leste no Austrália, ho diskusaun sira ne’ebé foka ba objetivu dezenvolvimentu partilladu, kolaborasaun ekonómika, no Timor-Leste nia adezaun ba ASEAN,” Ministra Anne hateten ba jornalista sira, iha Palásiu Prezidensiál, Kuarta ne’e.

Durante enkontru, Prezidente Ramos-Horta hato’o agradesimentu ba Austrália nia apoiu ne’ebé metin tebes ba Timor-Leste.

“Austrália sai nu’udar parseiru ida ne’ebé metin iha Timor-Leste nia viajen ba estabilidade no prosperidade. Enkuantu ita prepara atu tama ba ASEAN, ita valoriza kooperasaun kontinua iha komérsiu, investimentu, no ligasaun povu ho povu ne’ebé sei dudu kresimentu sustentável ba ita-nia nasaun rua ne’e,” Prezidente Ramos-Horta akresenta.

Notísia relevante : PR: “Konferénsia ida-ne’e sai ponte reforsa kooperasaun no dezenvolve ekonomia”

Austrália no Timor-Leste iha amizade kleur ona, ne’ebé hametin liuhusi ligasaun forte entre povu ho povu.

Dezde Timor-Leste nia independénsia iha tinan 2002, Austrália sai nafatin ninia parseiru dezenvolvimentu no seguransa ne’ebé boot liu, nasaun rua ne’e ativamente parseiru iha kooperasaun sira iha setór oinoin, inklui dezenvolvimentu, diversifikasaun ekonómika, programa Mobilidade Traballu Pasífiku Austrália (PALM), projetu infraestrutura boot sira, edukasaun, seguransa no defeza, ligasaun entre povu, apoiu ba Timor-Leste nia adezaun ba membru Organizasaun Mundiál Komérsiu (OMK) no adezaun ba ASEAN.

Ministra Anne Aly vizita Timor iha ámbitu partisipa iha Konferénsia Ekonómika no Negósiu Timor-Leste–Austrália daruak (TLAUCON 2025), ne’ebé hala’o iha loron 06 to’o 08 Agostu iha Sentru Konvensaun Dili, ne’ebé ko-host husi Governu Timor-Leste no Austrália, ho objetivu atu hametin lasu ekonómiku liuhusi promove investimentu iha setór xave sira, inklui agrikultura, turizmu, manufatura, no rekursu minerál sira.

Jornalista     : Hortencio Sanchez

Editora          : Julia Chatarina