DILI, 07 Agostu 2025 (TATOLI) – Governu liuhusi Sekretária Estadu Formasaun Profisionál no Empregu (SEFOPE) kontinua fó oportunidade ba traballadór timoroan hamutuk na’in-103 hodi serbisu iha Austrália, iha ámbitu programa mobilidade traballu Pacific Australia Labour Mobility (PALM, sigla inglés) – Programa ida-ne’ebé fó oportunidade ba traballadór husi Timor-Leste no nasaun Pasífiku atu serbisu iha Austrália, espesialmente iha área rurál no agrikultura, tanba falta traballadór lokál.
Iha atividade ohin loron hetan partisipasaun mós husi Ministra Dezenvolvimentu Internasionál, Ministra Empreza Ki’ik no Ministra Asuntu Multikulturál, Anne Aly, akompaña traballadór timoroan sira asina memorandu ho empregadór PALM.
Sekretáriu Estadu Formasaun Profisionál Empregu, Rogério de Araújo Mendonça, iha entrevista ho jornalista sira hateten, atu adianta de’it ba públiku katak, antes traballadór sira atu sai ba servisu iha rai-li’ur, entaun ohin oportunidade di’ak ida tanba marka mós prezensa husi Ministra Dezenvolvimentu empreza ki’ik ne’ebé apresia ho programa mobilizasaun traballadór Timór ba Austrália
“Enkuantu husi traballadór 103 ne’e barak liu mak traballadór foun, no sira ida re-entry ne’e ho númeru ne’ebé maka 17-18 de’it, sei servisu iha área agrikultura no ospitalidade”, Sekretáriu Estadu Rogério de Araújo Mendonça, informa iha otél Palm Spring, Kampung Alor, ohin.
Hatudu atitude di’ak no kumpre regra
Governante ne’e husu ba traballadór sira atu hatudu sira-nia atitude ho di’ak hodi reprezenta Timor-Leste nia identidade no kumpri regra atu labele sai husi sistema tanba bainhira traballadór sira hatudu prestasaun di’ak ne’e mak Austrália nafatin simu traballadór timoroan sira-nia prezensa.
Iha oportunidade ne’e mós Ministra Dezenvolvimentu Internasionál, Ministra Empreza Ki’ik no Ministra Asuntu Multikulturál, Anne Aly, hato’o mensajen ba traballadór timoroan sira atu aproveita oportunidade ne’e ho di’ak.
“Imi-nia prezensa mós fó kontribuisaun ba nasaun Austrália nia dezenvolvimetu ba setór agrikultura no ospitalidade”, Ministra ne’e esplika.
Nia énfaze, traballadór sira tenke iha kompromisu hodi fó kontribuisaun ba família no nasaun.
Parte seluk, Reprezentante traballadora timoroan ne’ebé serbisu iha kompañia Queensland Berries ba Austrália, Fatima Pinto, sente kontente tanba bele kontinua servisu iha Austrália, tanba antes ne’e nia mós serbisu ona iha Austrália iha área ortikultura.
“Foin dadauk ha’u mai Timór tanba de’it kontratu ramata tanba ami-nia kontratu kada fulan-sia. Maibé, ha’u-nia viza sei válidu to’o tinan haat ne’e mak kompañia fo fali oportunidade mai ha’u hodi kontinua hala’o servisu durante fulan sia,” nia informa.
Traballadora timoroan ne’e hatutan, nia sei esforsu hala’o servisu ho di’ak tuir regra ne’ebé mak iha atu labele sai husi sistema no nia promete sei kontribui finanseira ba nia família no mós Timor-Leste.
Entretantu, traballadór hirak-ne’e sei dezloka ba Austrália iha fulan ida ne’e nia laran tanba daudaun ne’e SEFOPE prepara hela billete aviaun nian.
Jornalista: Alexandra da Costa
Editór: Rafael Ximenes de A. Belo
