DILI, 08 Agostu 2025 (TATOLI)–Prezidente Repúblika, José Ramos-Horta, konstrui uma dignu ida ba oan-ki’ak na’in-haat iha Suku Lourba, Postu Administrativu Bobonaru, Munisípiu Bobonaru no konstrui mós uma dignu ba família avó Paulo iha Aldeia Taiubu, Postu Administrativu Atsabe ne’eb’e atinje ona 80%, foin lalais ne’e.
Tuir nota ne’ebé Tatoli asesu katak, ekipa Prezidénsia Repúblika liuhusi Unidade Serbisu Sosiedade Sivil no Asuntu Sosiál, hala’o vizita ba familia oan-ki’ak na’in-haat iha Aldeia Gumer, Suku Lourba, Postu Administrativu Bobonaro, ne’ebé mak hetan benefísiu konstrusaun uma mahon ida, tuir autorizasaun Prezidente José Ramos-Horta nian, hanesan resposta ba proposta formál husi lideransa lokál.
Antes ne’e, Ekipa Prezidénsia halo vizita no avalia situasaun moris ba família ne’e nian, ne’ebé hela iha kondisaun lakon inan-aman, tanba sira-nia aman mate iha tinan 2019 no inan mate iha tinan 2022, sira sei ki’ik no hetan kuidadu husi Tiu/Avo sira ne’ebé hela besik sira.
Francisca da Costa ho tinan-17 sai bin ida hodi tau matan ba nia alin na’in-tolu, iha uma ki’ik ne’ebé kondisaun moris ladún di’ak.
Iha tempu udan no anin, iha uma laran sira hetan bokon tanba kondisaun uma ladun fó protesaun.
Observasaun ekipa ne’e hala’o tuir kordenasaun ho Xefe Suku Lourba, Lino da Cruz, ho lideransa komunitária sira. Proposta formal dirije ba Gabinete Prezidénsia no direta ba Prezidente José Ramos-Horta, tan ne’e fó autorizasaun hodi konstrui uma mahon ida ba sira.
Konstrusaun uma ne’e foin mak atinje progresu 75%. Uma foun ida-ne’e sei kompleta ho kuartu tolu (3), sala han ida, dapur, varanda no haris fatin. Ne’e hanesan rezidénsia dignu no seguru ba labarik sira iha moris ne’ebé fó esperansa foun.
Alin feto Francisca da Costa, hato’o nia gratidaun ba Prezidente José Ramos-Horta no ekipa sira.
“Obrigadu ba Abó Ramos-Horta tanba halo ona uma ida mai ami no obrigadu ba ekipa sira ne’ebé serbisu besik atu hotu ona,” Francisca hateten.
Inisiativa solidariedade ne’e fó ezemplu klaru kona-ba komprimisiu Prezidénsia Repúblika José Ramos-Horta nian, atu responde ba nesesidade komunidade no evidénsia responsabilidade Estadu atu garante dignidade, seguransa no moris di’ak ba labarik sira iha Timor-Leste.
Alende ne’e, Prezidente Repúblika José Ramos-Horta, konstrui mós uma dignu iha Aldeia Taiubu, Postu Administrativu Atsabe ne’ebé atinje ona 80% ba Família Avo Paulo.
Sentimentu kontente no agradeesimentu mak domina iha uma Avo Paulo ho nia família iha Aldeia Taiubu, Suku Lasaun, Postu Atsabe, Munisípiu Ermera, tanba hetan ajuda konkretu husi Prezidénsia Repúblika liuhusi programa Uma Dignu.
Ekipa Prezidénsia, liuhusi Unidade Serbisu Sosiedade Sivil no Asuntu Sosiál, hala’o vizita ba familia ne’e atu hare’e direta progresu konstrusaun, ne’ebé atu sai uma rezidénsia foun ida ho estandarte seguru no dignu.
“Tinan barak ami hela iha fatin ai-hun no fatuk kuak ikus mai muda ba Uma didin ida, tempu udan no loron-manas bele halo ami la seguru. Agora ami sente moris di’ak tanba Prezidente hatán ami-nia hakarak,” Abó Paulo hateten.
Antes ne’e, ekipa téknika halo observasaun direta hodi avalia situasaun moris familia ne’e nian, ho suporta no proposta formál husi Xefi Suku Lasaun, Abrão da Conceição. Husi ne’e, Prezidente Repúblika José Ramos-Horta autoriza lansamentu konstrusaun, ne’ebé komesa iha fulan-Maiu 2025.
To’o agora, progresu konstrusaun uma ne’e hetan ona 80%, kompleta ho kuartu tolu, sala vizita, sala han, Varanda no dapur, haris fatin ketak inklui mobiliáriu baze.
Programa Uma Dignu ne’e mak parte husi vizaun Prezidente Repúblika nian atu fó resposta ba nesesidade urgente sosiál, espesiálmente ba familia sira ne’ebé kbi’it naton iha área rurál.
TATOLI
