DILI, 09 Agostu 2025 (TATOLI)—Asosiasaun Jornalista Timor-Leste (AJTL), Sábadu ne’e, briefing jornalista sira husi plataforma mídia oinoin hamutuk na’in-17 antes bá halo kobertura kona-ba espozisaun iha Rabilau hodi selebra Loron Internasionál Juventude.
Atividade ne’e organizasaun naun-governamentál (ONG) internasionál OXFAM no Alumi Parlamentu Foinsa’e Timor-Leste (APFTL) mak sai hanesan komisaun organizadora, enkuantu AJTL mak halibur jornalista sira hodi halo kobertura ba atividade espozisaun.
“Ohin loron ita briefing kolega jornalista sira nune’e sira bele hatene papél saida mak sira sei halo durante kobre atividade ne’e. Tanba ne’e, ita sei halo notísia kona-ba inspirasaun, susesu no problema ne’ebé mak grupu produtivu sira enfrenta. Tanba joven sira-ne’e kompostu husi área rurál entaun públiku ladún koñese sira, nune’e papél ita-nian oinsá atu halo promosaun no promove sira liuhusi mídia,” Prezidente AJTL, Zevónia Vieira hateten iha sede AJTL, Fatuhada, Dili.
Nia esplika katak atividade prinsipál komemorasaun nian sei realiza iha 12 Agostu, maibé iha 10-11 Agostu sei fó espasu ba jornalista sira hodi halo kobertura asuntu sosiál hodi kontribui ba nesesidade redasaun.
“Iha loron-12 Agostu, hotu-hotu sei konsentra iha fatin espozisaun hodi foku de’it ba atividade prinsipál, tanba sei marka mós prezensa husi bainaka importante sira hanesan governante no parseiru dezenvolvimentu,” Zevónia informa.
Nia apela ba jornalista sira atu prepara saúde no atributu ne’ebé bele tulun durante atividade espozisaun iha Rabilau.
Ekipa sei aranka iha Domingu (10/08/2025) ba Postu Administrativu Maubisse, Munisípiu Ainaru no iha loron Segunda (11/08/2025) lia-na’in sira husi Maubisse sei simu ekipa liuhusi kultura atu asegura seguransa durante hela iha Sítiu Turizmu no Kultura Rabilau.
Atividade iha Rabilau
- Sei iha espozisaun husi grupu produtivu na’in-15;
•Diálogu abertu husi governante no OXFAM; - Kuda ai-oan;
- Animasaun kalan kultura
Jornalista: Alexandra da Costa
Editór: Xisto Freitas da Piedade
