Tinan-oin Governu implementa reforma ne’ebe dignu ba membru PNTL

DILI, 14 Agostu 2025 (TATOLI)-Ministru Interiór, Francisco da Costa Guterres, hateten Governu sei halo reforma dignu ba membru Polísia Nasionál Timor-Leste (PNTL) ne’ebé pasa ba idade reforma iha tinan-oin.
“Tinan ne’e ita foku ba rekrutamentu no rekrutamentu ba membru polísia hahú la’o ona. Ida-ne’e hotu, tinan-oin ita sei tama reforma, ne’ebé tinan-oin mak ita halo reforma ba membru PNTL ne’ebé idade tama ona reforma”, dehan ministru ba jornalista sira hafoin partisipa serimonia aniversáriu Unidade Espesiál Polísia (UEP) ba dala-16 iha Kuartél UEP Bairru Pité, kinta-ne’e.
Nia dehan estatutu PNTL foun haktuir ajente ofisiál sira idade 60 tenke reforma, enkuantu ofisiál superiór PNTL se mak tama idade 62 tenke pasa ba reforma. “Reforma ne’e obrigaóriu, maibé reforma ne’ebé ita atu halo ba membru polísia sira ne’ebé tama ona idade reforma ne’e Governu sei trata sira ho dignu”.
Ministru esplika Governu sei foku identifika membru sira ne’ebé kondisaun labele halo ona servisu. “Ita kria kondisaun ba sira, ne’ebé mak labele halo servisu, ha’u iha dadus purvolta 100-resin mak labele halo servisu, sira ne’e hein de’it atu pasa ba reforma iha tinan oin”.
Governante ne’e dehan parte Governu sei diskute didiak mekanizmu sira reforma nian molok implementa.
“Ita tenke trata sira ho dignu tanba sira dedika ona sira nia-án ba instituisaun PNTL hodi servisu ba povu no Nasaun to’o ohin loron”, konklui.
Notísia relevante: Governu promete halo reforma dignu ba membru PNTL
Jornalista : Natalino Costa
Editora : Rita Almeida

