Autoridade Likisá propoin millaun $9,7 ba saúde, edukasaun no infraestrutura
DILI, 15 Agostu 2025 (TATOLI) – Autoridade Munisipál Likisá husu adisionál millaun $9,7 iha proposta Orsamentu Jerál Estadu (OJE) 2026, durante iha reuniaun Komité Revizaun Orsamentu (KRO).
Tuir Prezidente Autoridade Likisá, Paulino Nuno Ribeiro, tetu ne’ebé fó Ministériu Finansa fó hamutuk millaun $5,9 (ba saláriu no vensimentu, bens no serbisu no trasferénsia públika) no la kobre nesesidade, tanba ne’e aprezenta tanba proposta adisionál millaun $2 ba kapitál menór no $7,7 ba kapitál dezenvolvimentu.
Fundu adisionál ne’e atu finansia projetu dezenvolvimentu 42, inklui tolu reapropriasaun husi tinan kotuk, projetu 10 iha tinan ne’e, foun 34 ne’ebé sei implementa iha tinan oin, liuliu iha iha área saúde, edukasaun, agrikultura no infraestrutura bázika, hanesan estrada no sistema abastesimentu bee.
Proposta ne’e inklui mós finansiamentu ba atividade hanesan viajen lokál, sosa komutadór sira ba suku no ekipamentu administrativu sira seluk.
Husi prioridade sira ba tinan oin sei konstrui postu saúde iha suku sira ne’ebé seidauk iha no edifísiu eskolár, nomós investimentu iha setór agrikultura, jestaun merkadu, turizmu, no infraestrutura bázika, liuhusi Programa Nasionál Dezenvolvimentu Suku (PNDS), ne’ebé sei implementa projetu 23 ba konstrusaun estrada entre suku no aldeia.
Tuir Paulino Ribeiro, KRO responde pozitivamente proposta ne’ebé hato’o, maski desizaun finál iha Prezidente KRO.
Nia mós salienta katak programa no prioridade ne’ebé autoridade trasa ne’e parte ida mós halo preparasaun ba kondisaun mínima atu simu podér lokál husi Governu sentrál.
Autoridade Likisá nia orsamentu ba tinan ne’e hamutuk millaun $7,8, ne’ebé ezekuta ona 66%.
Jornalista: Nelson de Sousa
Editora: Maria Auxiliadora
