OMS reforsa programa Governu kombate mánutrisaun-promove alimentasaun saudavel
DILI, 15 Agostu 2025 (TATOLI)—Organizasaun Mundiál Saúde (OMS) fó hela apoiu tékniku no polítiku ba Governu Timor-Leste hodi kombate mánutrisaun, obesidade no promove alimentasaun saudavél.
“OMS oferese asisténsia liuhusi polítika públika sira, advokasia no intervensaun sira-ne’ebé kustu efetivu, ho foku espesiál ida iha promosaun fó susu-been inan eskluzivu, kombate obesidade infantil no prevene defisiénsia nutrisionál sira,” Reprezentante OMS iha Timor-Leste, Arvind Mathur, hateten ba Agência Tatoli iha nia kna’ar fatin, Kaikoli, ohin.
Tuir nia, apoiu polítiku esensiál atu garante prátika alimentasaun saudavél hahú husi loron dahuluk sira moris nian.
“Ezemplu apoiu ba Kódigu Internasionál OMS nian husi substitutu sira ba susu-been inan nian, ne’ebé buka limita komersializasaun husi fórmula sira infantil nian no enkoraja fó susubeen-inan eskluzivu to’o fulan neen,” nia dehan.
Nia relata, OMS servisu hamutuk hodi hametin polítika públika sira-ne’ebé hakarak kombate defisiénsia mikronutriente sira no problema ne’ebé aumenta husi obesidade no todan liu, liuliu iha labarik sira.
“Ami iha kompromisu atu fornese intervensaun sira ne’ebé kustu-efetivu, hanesan estratéjia sira alimentasaun adekuadu nian ba kosok-oan sira no labarik ki’ik sira,” nia hateten.
Nia hatutan, OMS aliña ho planu Governu nian no integra liuhusi mekanizmu multisetoriál sira, hanesan grupu traballu interministeriál sira. Kooperasaun ida-ne’e ho objetivu atu kria no implementa planu asaun nutrisaun nasionál ne’ebé konsolidadu.
“Entre objetivu sira mak asegura katak bebé foin moris sira hetan susu-been inan eskluzivu, katak labarik sira no adolexente sira iha asesu ba nutrisaun adekuadu, katak joven sira no adultu sira hetan protesaun husi aihan sira-ne’ebé perigozu,” nia dehan.
Nia hatutan, importánsia husi aprosimasaun siklu-moris nian, ne’ebé konsidera nesesidade nutrisionál sira husi infánsia to’o adultu, inklui adolesente no saúde inan nian.
“Ami hatene katak stunting hanesan ezemplu, hanesan problema króniku no inter-injesionál. Hafoin tinan rua, efeitu sira sai kuaze irreversívél. Tanba ne’e, hanesan krusiál investe iha nutrisaun inan no labarik nian hahú husi idade ki’ik,” nia hateten.
Nia dehan, organizasaun ne’e hanesan parseiru prinsipál ida hosi Ministériu Saúde nian iha dezenvolvimentu estratéjia nutrisionál sira 2025 nian, ne’ebé foka ba hadi’a nutrisaun labarik nian no prevensaun moras sira-ne’ebé relasiona ho nutrisaun.
“Liuhusi serbisu hamutuk ne’e, OMS reafirma nia kna’ar hanesan parseiru tékniku ba Governu sira, oferese la’ós de’it rekomendasaun sira maibé mós instrumentu prátiku sira hodi transforma polítika públika sira iha benefísiu loloos ba populasaun nia saúde,” nia dehan.
Jornalista : Felicidade Ximenes
Editór : Cancio Ximenes
