OEKUSI, 18 Agostu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), prepara ona ajenda prinsipál hitu ba komemorasaun loron Forsa Armada ba Libertasaun Nasionál Timor-Leste (FALINTIL) 20 Agostu da-50, ne’ebé realiza iha kampu futeból Oébau, suku Costa sub-rejiaun Pante Makasar.
Notísia relevante:Selebra loron FALINTIL ba dala-50, Fogeti prefere sosializa ba jerasaun foun
Prezidente Komisaun Organizadora, Andre La’o, informa katak, ajenda prinsipál hitu ne’e mak hanesan, misa agradesimentu sei hala’o iha loron tersa-feira, 19 Agostu 2025 iha igreja parókia Nossa Senhora do Rosário Numbei iha tuku 08:00 dadeer.
Hafoin sai husi misa, kontinua kari ai-funan iha semitériu da pátria iha Santa-Rosa iha tuku 09:30, depois kontinua parada populár, husi semitériu ba kampu futeból Oébau. Diskursu ofisiál komandu, F-FDTL no membru Governu, desfile populár, reflesaun no diálogu nasionál, desportu komunitáriu hanesan dada-tali no almosu komfraternizasaun iha tuku 12:30 realiza iha kampu futeból Oébau.
“Ajenda prinsipál hitu ne’e, ita prepara antes semana rua ona ho ita-nia forsa sira, F-FDTL, PNTL inklui kargu diretór sira, ne’ebé ohin ita mai halo gladi (ensaiu) parada populár, atu prepara selebra iha aban dadersan hafoin sai husi misa no kari ai-funan, tanba bairua kuarta-feira, seremónia ne’e konsentra hotu iha nasionál,” Andre La’o, ba jornalista sira iha kampu futeból Oébau, ohin.
Nia informa, komemorasaun loron FALINTIL iha Oekusi, marka prezensa mós husi membru Governu na’in-rua mak, Vise-Ministru Solidariedade Sosiál no Inkluzaun (MSSI) no Ministru Komérsiu no Indústria (MCI).
Aliende ne’e, atu finansia loron komemorasaun ne’e, mai husi parte rua, husi Komandu F-FDTL oferese rihun $10 ba komisaun organizadora no husi Autoridade RAEOA oferese rihun $17.
“Ne’ebé orsamentu hamutuk rihun $27, no orsamentu ne’e aloka kedas ba eventu nasionál rua, loron FALINTIL nian no mós loron Konsulta Populár 30 Agostu, entaun ita jere ho didi’ak, nune’e eventu rua ne’e bele la’o ho susesu,” nia tenik.
Notísia relevante:Tinan 50 reflete loron FALINTIL, estudante tenke sai kontinuadór
Iha fatin hanesan, Jestór Sub-rejiaun Pante Makasar, Lorencio da Cunha, sente orgullu tanba primeira-véz selebra iha públiku tanba kompara ho tinan hirak kotuk, konsentra de’it iha postu F-FDTL.
“Konvite ami distribui ona Konsellu Suku sira hotu atu organiza an mai partisipa, hanesan iha Pante Makasar suku 10 sira prepara ona, balun orsida kalan tuun mai ona atu aban partisipa iha misa agradesimentu, tanba tinan ne’e mobilizasaun masa laiha, maibé Konsellu Suku sira tenke partisipa másima,” nia dehan.
Notísia relevante:Xanana: “Ha’u-nia inan Jacinta salva ha’u iha fatuk-kuak Lokuru-Bauro”
Entretantu, tema ba komemorasaun loron FALINTIL 2025 ne’e, reflete ba transformasaun FALINTIL ba F-FDTL liuliu ba dezenvolvimentu tuir nesesidade konstrusaun Estadu defende soberania independénsia, ‘atu dignifika eroi fó vida ba luta libertasaun’.
Jornalista: Abílio Elo Nini
Editór: Rafael Ximenes de A. Belo
