OEKUSI, 19 Agostu 2025 (TATOLI) – Antigu Komandante Forsa Armada ba Libertasaun Nasionál Timor-Leste (FALINTIL) iha tinan-1975, Rogério Tiago de Fátima Lobato, atuál Prezidente Autoridade Rejiaun Administrativa Espesiál Oekusi Ambeno (RAEOA), sujere ba Governu no Estadu Timor-Leste, moderniza ona fasilidade sira-ne’ebé F-FDTL sira uza, nune’e bele defende soberanu ne’e ho di’ak.
“Iha 1975, forsa balun laiha kilat, ekipamentu de’it mós balun laiha. Buat hotu laiha. Ita luta ho liman mamuk de’it, agora ha’u-nia hakarak, ita-nia Governu no Estadu, presiza hasa’e ona fasilidade moderna ba ita-nia forsa F-FDTL sira,” Rogério Lobato dehan, iha Oekusi.
Notísia relevante:Orden Rogério Lobato iha 1975, ‘oho inimigu no hadau kilat hodi kontinua funu’
Eis-Ministru Defeza 1975 ne’e, rekomenda mós ba Governu no Estadu, atu fó rekoñesimentu mós ba forsa tropa protugés sira, ne’ebé ezerse vida militar iha tempu Portugés, tanba sira ne’e mak sanak ai-hun ba FALINTIL, sira-ne’e mak hadau kilat rihun barak hodi loke FALINTIL.
“Entaun tenke mós halo rekoñesimentu ba sira. Rekoñesimentu ne’e la’ós fó de’it surat-tahan ida nu’udar fundadór, labele! Tenke iha rekoñesimentu dignu, Governu mak tenke haree, labele de’it ho surat-tahan, maibé tenke iha benefisíu balu ba sira, tanba sira mós fó sira-nia vida sakrifika nia aan ba rai ne’e,” nia rekomenda.
Relasaun ho komemorasaun loron FALINTIL da-50, nia fó apelu mós ba F-FDTL sira, atu hatuur dixiplina no loialidade ba Estadu.
“Dixiplina mak save, tanba sira mak kontinuadór FALINTIL, ne’ebé moris iha 20 Agostu 1975. Entaun, tenke iha dixiplina, prepara-an, tanba ita sempre dehan, hakarak pás tenki prepara aan ba funu, entaun tenke iha preparasaun nafatin,” nia fó hanoin.
Notísia relevante:Governu presiza valoriza militár sira-ne’ebé hadau kilat iha 20 agostu 1975
Tuir nia, F-FDTL loloos, labele hela de’it iha kuartel, maibé komesa halo marsa iha foho, atu iha nafatin prontidaun kompativa, tanba iha funu, forsa barak mak mate tanba ekipamentu laiha, kilat laiha, atu defende an, entaun presiza halo esforsu oi-oin, hodi sosa kilat musan husi nasaun viziñu sira.
“Agora ita independente ona. Oras ne’e ita Estadu ida ona, oinsa mak Governu tenke fó fasilidade liuhusi Ministériu Defeza atu halo FALINTIL ne’e sai forsa moderna ho ekipamentu moderna, atu ita-bele defende ita-nia rai ho di’ak,” nia espera.
Tanba iha funu, kuaze ho liman mamuk de’it, maibé konsege manán funu, nune’e kuandu prepara-an didi’ak, ho ekipamentu ne’ebé modernu, ho aviaun ne’ebé di’ak, ró no karreta ho tanque de guerra, entaun ita-bele preparadu atu defende ita-nia rai.
“Iha ha’u-nia tempu, hanesan militár, ami hatene jere ba morteiru, bajoka, kañiaun, oras ne’e, ha’u sente katak ita-nia forsa sira laiha ekipamentu sira-ne’e, entaun forsa armada ho Ministru Defeza tenke ko’alia ba malu, hadi’a atu oinsá bele hasa’e kapasidade no ekipamentu, formasaun ba ita-nia forsa sira,” nia dehan.
Notísia relevante:Subar Xanana Gusmão, inimigu sira tetak moris ha’u-nia aman to’o mate
Tanba funu, agora iha era moderna, oin seluk ona tanba ema funu ho drone, entaun buat sira ne’e hatudu mai ita katak, ita tenke akompaña evolusaun mundu nian, iha setór hot-hotu, inkluzivamente iha setór defeza, ‘ida ne’e mak ha’u hakarak apela ba Governu atu fó atensaun espesiál ba forsa sira’.
Jornalista: Abílio Elo Nini
Editór: Rafael Ximenes de A. Belo
