BOBONARU, 26 Agostu 2025 (TATOLI)—Uma Kreda Timor-Leste, Tersa ne’e, realiza misa abertura Jornada Nasionál Juventude (JNJ) 2025 iha ámbitu vizita Krús Joven Internasionál iha Igreja Maria Imaculada da Conceição Parókia Postu Administrativu Bobonaru, Munisípiu Bobonaru ne’ebé partisipa husi foinsa’e Dioseze Maliana, Dili no Baukau.
Iha omília, Prezidente Komisaun Nasionál Juventude Katolíka Timor-Leste, Pe. Francisco Indra hateten prezensa Krús Joven Internasionál rezulta atividade Jornada Nasionál Juventude sai furak no espíritu liután, tanba Krús mak pontu kolminante no topu husi atividade JNJ 2025.
Notísia relevante: Sarani Dioseze Maliana halo venerasaun ba Krús Joven Internasionál ho entusiazmu
Nia fiar katak ezisténsia Krús Joven Internasionál ne’e lori grasa, pás no domin ba sarani sira hotu.
“Ohin ita mai iha fatin ida-ne’e atu ita idak-idak manifesta ita-nia fiar hateke ba Krús. Ha’u konvida idak-idak mai halo reflesaun no konxiente katak ha’u-nia moris ne’e presiza grasa,” Amu hateten iha omília.
Amu-lulik ne’e salienta JNJ sai ponte reflesaun ba juventude atu halo buat di’ak iha sosiedade nia leet hodi sai solusaun ba sira-nia moris.
“Joven nia moris problemátiku. Buat hotu-hotu, sala joven. Tuda-uma, joven. Hein ema iha dalan, joven. Problema sira-ne’e joven hotu de’it. Nune’e, maluk joven sira mai ita idak-idak ho Jornada Nasionál Juventude, espera buat hotu-hotu iha sosiedade nia di’ak sai ponte reflesaun. Labele foti fali sai hanesan todan ida, maibe foti ida-ne’e sai hanesan solusaun ba ita-nia moris,” nia subliña.
Entretantu, Jornada Nasionál Juventude realiza ho atividade espirituál sira hanesan katakeze, palestra no konsertu espirituál durante loron tolu, hahú husi 27-29 Agostu.
Jornalista: Sergio da Cruz
Editór: Xisto Freitas da Piedade
