DILI, 25 Agostu 2025 (TATOLI)—Ekipa mídia no produsaun Centro Audiovisual Max Stahl Timor-Leste (CAMSTL), Segunda (25/08) ne’e, fó sai filme istória, hodi komemora tinan-50 ezisténsia Forças Armadas da Libertação Nacional de Timor-Leste (FALINTIL) inklui tinan-26 Konsulta Populár.
Atividade ne’e realiza iha resintu Institutu Politékniku Betanu (IPB) iha suku Betanu, postu administrativu Same, munisípiu Manufahi, ne’ebé partisipa husi komunidade lokál inklui estudante sira.
Koodenadór Mídia no Produsaun CAMSTL, Rogério Cardoso Neves, hateten, atividade ne’e aleinde hodi komemora loron istóriku rua, hodi hametin mós istória liuhusi partisipasaun no envolvimentu joven sira hodi sira bele hatene istória nasaun nian.
“Aleinde ne’e, oinsá atu eduka jerasaun foun kona-ba istória rezisténsia no violénsia direitu umanu iha Timor durante dékada rezisténsia hodi bele hari pás no rekonsiliasaun iha baze,” nia akresenta.
Notísia relevante : Produtór sinema Ian White planeia prodús tan filme kona-ba istória Timor
Rogerio Neves hatutan atividade ne’ebé hanaraan ‘Lori istória ba munisípiu’ ne’e hodi responde ba loron istóriku sira ne’ebé la’o iha munisípiu 13 hotu hodi komemora loron istória komemorativa sira hanesan 02 Fevereiru (Transformasaun FALINTIL ba F-FDTL), 03 Marsu (Veteranu), 20 Maiu (Proklamasaun Independénsia), 20 Agostu (Ezisténsia FALINTIL) hodi fó onra ba aswain sira, ne’ebé la’o desde inísiu Fevereiru 2025 no sei termina iha Lospalos ho Masakre Muapitine.
Iha Fatin hanesan, Vise-Prezidente IPB no Dosente, Amancio Horacio, konsidera atividade ne’e importante ba joven sira tamba bele hametin joven sira-nia espíritu patriotizmu no nasionalizmu iha instituisaun akadémiku sira no liuhusi filme istória.
“Sira ne’e oinsá fanu filafali joven sira hodi hateke ba kotuk hare aswain sira-nia sakrifísiu ba libertasaun ita-nia rain,”nia katak.
Antes ne’e, atividade projesaun filme istória ne’e la’o ona iha munisípiu Manatutu, Ainaru, Likisa no iha Manufahi. Ativade ne’e sei kontinua ba munísipiu seluk ne’ebé identifikadu ona.
TATOLI
