DILI, 28 Agostu 2025 (TATOLI)—Ministru Komérsiu no Indústria, Filipus Nino Pereira, motiva empreza kiik sira atu hadi’a ekonomia Timor-Leste.
“Ida mak ita hakarak atu fó motivasaun ba empreza kiik sira katak buat ida negósiu kiik sira-ne’e dalan ne’ebé di’ak atu hadi’a ita-nia ekonomia, diversifika ita-nia ekonomia no diversifika ita-nia negósiu iha rai-laran,” Governante ne’e hateten ba Agência TATOLI iha Sentru Konvensaun Dili (CCD, sigla portugés), ohin.
Nia dehan, hakarak promove espiritu emprendedorizmu ba foinsa’e sira atu haree tipu negósiu ne’ebé mak merkadu presiza.
“Ha’u hanoin ita-nia joven balun presiza tebes vida negósiu nian hakarak tebes envolve iha vida emprezáriu nian, atu nune’e dudu nafatin ekonomia ba oin atu ita la depende ba emprezáriu sira husi rai-li’ur,” nia dehan.
Nia esplika, hanesan ko’alia beibeik katak produtu barak mai husi nasaun sira iha rai-li’ur, produtu barak importadu no produtu balun subtitui ho produtu lokal ona.
“Ami ba vizita emprezáriu balun prodús aihan balun produtu uza ita-nia aihan liuliu aihan lokál ne’ebé mak mai husi munisipiu, entaun ida-ne’e mak ita dehan katak dezenvolve ita-nia ekonomia lokál,” nia dehan.
Jornalista : Fellicidade Ximenes
Editór : Cancio Ximenes
