MI orienta Komandu PNTL promove diálogu ho Autoridade Indonézia ba kestaun seguransa

DILI, 04 Setembru 2025 (TATOLI)–Ministru Interiór, Francisco da Costa Guterres orienta Komandu Polísia Nasionál Timor-Leste (PNTL) liuhusi ekipa Investigadór sira atu promove diálogu ho Autoridade Indonézia ba kestaun seguransa.
Governante hato’o kestaun ne’e relasiona ho kazu abitante iha fronteira Oekusi no Indonézia inklui sidadaun Indonézia ne’ebé mate iha área fronteira Fatumea, Munisípiu Kovalima foin lalais.
“Ami kontinua tama ho diálogu, ita kontinua halo diálogu oinsá ita buka mós ho komunidade, ita mobiliza komunidade, komunika ho Autoridade lokál para depois ita kontinua tenta nafatin dialogu, tanba meiu diálogu ne’e mak ajuda atu rezolve problema. Ita aproveita diálogu ne’e mak ita foin hatene problema nia hun, depois mak ita buka solusaun hodi rezolve problema ne’e,” Ministru hato’o ba Jornalista sira iha nia knaar fatin, Vila-Verde, Kinta ne’e.
Ekipa PNTL destakadu iha Oekusi no Kovalima, liuliu iha fatin akontesimentu daudaun ne’e halo hela diálogu hodi buka solusaun.
“Daudaun diálogu la’o ona, foin daudaun ba kazu Oekusi Komandu desloka ekipa bá kedan iha fatin akontesimentu nomós ita hahú prosesu diálogu iha Suai no diálogu iha Suai mós sira la’o hela, sira komesa tenta mobiliza Polísia Komunitária hodi halo diálogu ba komunidade hodi buka solusaun ba problema,” nia akresenta.
Notísia relevante : “Problema iha fronteira Oekusi, ha’u hakerek ona karta ba Prabowo”
Iha fatin hanesan, Portavós Komandu Jerál PNTL, Superintendente Polísia João Belo dos Reis hateten, situasaun iha fatin akontesimentu Oekusi no Suai ne’e kontroladu.
“Ami halo koordenasaun ho Autoridade Indonézia la’o di’ak tebes no depois ba kazu Oekusi husi investigasaun Kriminál aprezenta faktu ona ba Ministériu Públiku hodi kontinua prosesu ba investigasaun kriminál,” nia katak.
Portavós dehan, kazu ne’ebé akontese iha Oekusi iha duni indísiu katak iha sidadaun ne’ebé hela besik fronteira Oekusi mak muda tiha destakamentu, tanba ne’e mak mosu problema.
“Maibé ba prosesu ne’e investigasaun la’o hela no negosiasaun ho parte Indonézia ita kontinua la’o tanba iha indikasaun, tanba fronteira ne’ebé iha ne’e ita-nia maluk sira halo mudansa maibé parte instituisaun ekipa husi nasaun rua halo serbisu tuir akordu ne’ebé mak iha no ami kontinua hamutuk hodi halo investigasaun nune’e fó solusaun ba problema ne’e,” nia esplika.
Superintendente Polísia João Belo hateten, situasaun iha fatin akontesimentu daudaun ne’e kontroladu tanba Autoridade Indonézia mós aviza ona nia ba nia sidadaun sira atu labele tama iha área ne’ebé mak la pertese ona ba sira.
“Daudaun parte TNI (Tentara Republik Indonesia) halo kordenasaun ho UPF (Unidade Patrullamentu Fronteira) no agora ita-nia UPF iha ne’ebá. Ba buat balun, ha’u labele ko’alia tanba sai hanesan segredu justisa, ne’ebé ha’u la fó sai maibé ba kazu Oekusi ne’e iha indísiu katak bainhira ekipa tun hodi haree iha mudansa ba markasaun fronteira foun, tanba ita-nia maluk sira sente afetadu no la simu ne’e mak sira hamosu problema,” nia informa.
Portavós hatutan, UPF halo koordenasaun ho TNI di’ak tebes no parte rua kompromete atu garante seguransa másimu iha liña fronteira.
Jornalista : Natalino Costa
Editora : Julia Chatarina

