PR konsidera “Banco do Nosso Futuro” nu’udár banku kapitál eskluzivamente TL
DILI, 04 Setembru 2025 (TATOLI)—Prezidente Repúblika (PR), José Ramos-Horta konsidera Banco do Nosso Futuro (BNF), ne’e nu’udár banku kapitál eskluzivamente Timor-Leste nian.
“Banco do Nosso Futuro destaka nu’udár banku privadu dahuluk, ne’ebé nia kapitál eskluzivamente Timór nian ne’ebé la pertense ba Estadu,” Prezidente Repúblika dehan iha serimónia inaugurasaun BNF ne’ebé hala’o iha sede Konsellu Kombatente Libertasaun Nasionál (CCLN) Komoro, Dili.
Xefe Estadu ne’e realsa katak ida-ne’e reflete marku maturidade ekonómika nian no transformasaun husi rekursu veteranu sira-nian, iha instituisaun finanseira sólida no iha vizaun ba futura.
“Maski harii atu serbí nesesidade veteranu no sira-nia família nian, maibé misaun banku nian inkluzivu no dirije ba timoroan hotu,” Xefe Estadu hateten.
Notísia relevante: Banco do Nosso Futuro ofisialmente hahú halo operasaun
PR Ramos-Horta subliña importánsia husi instituisaun ne’e sei sai pilár ba inkluzaun finanseira, ho kapasidade atu disponibiliza servisu sira asesivel iha territóriu.
“Banco do Nosso Futuro la’ós de’it hanesan entidade finanseira ida maibé konsidera hanesan legadu husi luta ba libertasaun, ne’ebé dezenvolve atu fó kbiit ba sidadaun hotu no ajuda dudu kreximentu ekonómiku ba jerasaun sira tuirmai,” Horta tenik.
Iha inaugurasaun ne’e, Prezidente Repúblika, José Ramos-Horta hatudu ninia apoiu ba inisiativa ekonómika nasionál foun ida hodi sai nu’udár kliente dahuluk husi “Banco do Nosso Futuro” ka “Banku ba Ita-nia Futuru” ne’e.
Estabelesimentu husi instituisaun finanseira ida-ne’ebé harii no na’in mak veteranu sira rasik. Jestu simbóliku husi Xefe Estadu, bainhira loke konta dahuluk, ne’e hatudu ninia konfiansa ba potensiál husi Banco do Nosso Futuro nian hodi kontribui ba prosperidade Timor-Leste nian.
Xefe Estadu akresenta lansamentu Banco do Nosso Futuro reprezenta etapa istórika ida ba antigu kombatente sira, ne’ebé nu’udár protagonista ba libertasaun nasionál ba ajente ativu iha konstrusaun ekonómika nasaun nian.
Jornalista: Osória Marques
Editór: Xisto Freitas da Piedade
