Zé Pedro hahú treina no halo selesaun ba ekipa nasionál
DILI, 05 Setembru 2025 (TATOLI)–Treinadór prinsipál Zé Pedro iha Sesta ne’e hahú treina no halo selesaun ba jogadór antes deside ekipa prinsipál selesaun nasionál hodi kompete iha kualifikasaun Asian Cup 2027.
Ekipa Treinadór ne’ebé lidera husi José Pedro Alves Salazar aliás Zé Pedro, antes ne’e anúnsia ona lista jogadór hamutuk na’in-26 ne’ebé fahe ba grupu rua. Grupu dahuluk hahú ona treinu hodi kontinua halo selesaun ba jogadór ne’ebé sei prenxe rekizitu hodi envolve iha ekipa selesaun nasionál, hodi prepara ba Jogu Kualifikasaun Tasa Áza AFC 2027.
“Bainhira selesaun faze daruak ne’e konkluidu, treinadór sei halo konvokatóriu lista finál ba ekipa ho ema na’in-23 hodi kontinua ba hala’o Training Camp (TC) iha Darwin-Austrália,” nota imprensa ne’ebé TATOLI asesu iha Sesta ne’e hateten.
Notísia relevante: Zé Pedro anúnsia lista jogadór na’in-26 prepara tuir kompetisaun kualifikasaun Asian Cup
Nia dehan treinamentu ba selesaun ne’e hala’o iha kampu futeból KOICA Bekora, ne’ebé grupu dahuluk hahú treinu iha loron 03-09 Setembru no sei kontinua ba grupu daruak hafoin grupu dahuluk ramata tuir selesaun.
“Nune’e deside halo sistema treinu hodi halo selesaun ba lista jogadór sira-ne’ebé ho objetivu hakarak haree no akumula loloos talentu, kapasidade, abilidade futebolista timoroan sira-nian ne’ebé iha no fo importánsia ba atitude jogadór sira-nian atu hetan kualidade jogadór hodi reprezenta selesaun nasionál iha futuru,” nia tenik.
Entretantu, tuir oráriu, Timor-Leste sei hala’o jogu volta dahuluk kontra Filipina iha loron 09 Outubru no volta daruak iha loron 14 Outubru tinan ida-ne’e.
Jogu tolu seluk, sei kontra Tazaskistaun iha loron 18 Novembru no jogu ikus kontra Maladewa iha 31 Marsu 2026.
Lista jogadór na’in-26 ne’ebé partisipa treinu no tuir selesaun mak Pablo de Jesus (Ponta Leste), Alexandre Quintão (Emanuel FC), Natalino Soares (Ponta Leste), Adérito Pereira (DIT FC), Lesi Atok (Akademika FC), Fernando Carvalho (AD. SLB Laulara), Filomeno da Costa (AD. SLB Laulara), Emidio da Costa (AD. SLB Laulara).
Juvito Moniz (Emanuel FC) , João Soares (Karketu Dili FC), Francisco da Costa (Karketu Dili FC), Abîlio Jerónimo (Assalam FC), Ryan Jom (Austrália), Santiago da Costa (Karketu Dili FC), Kornelis Nahak (AD. SLB), Aldo Amarál (Coração FC).
Amancio Araújo (Emanuel FC), Edencio Soares (AD. SLB), Jardel Piedade (Portu Taibessi), Marques de Carvalho (AD. SLB), Xavier Bait (DIT FC), Mouzinho de Lima (AD. SLB), Elias Mesquita (Ponta Leste), Orcelio (AD. SLB), Lazario (Coração FC) no José Almeida (DIT Fc).
Jornalista: Natalino Belo
Editór: Xisto Freitas da Piedade
