DILI, 10 Setembru 2025 (TATOLI) —Funsionáriu superiór sira hosi Estadu-membru sira hosi Asosiasaun Nasaun sira Sudeste Aziátiku nian (ASEAN, sigla ingles) halibur iha Port Dickson, Negeri Sembilan, Malázia, iha loron-kuarta ne’e hodi ko’alia kona-ba preparasaun sira hodi simu Timor-Leste nu’udar membru plenu iha organizasaun rejionál.
Reuniaun ne’e prezide husi Sekretáriu-Jerál Ministériu Negósiu Estranjeiru Malázia nian, ne’ebé hanesan mós ofisiál superiór ASEAN nian ba Malázia, no hetan partisipasaun husi líder sira husi SOM ASEAN nian, líder sira husi SOM Timor-Leste nian no Sekretariadu ASEAN nian.
Ministériu Negósiu Estranjeiru Malázia nian, iha komunikadu ida iha Kuala Lumpur, iha loron-kuarta ne’e, afirma katak enkontru ne’e ko’alia kona-ba asuntu oioin, inklui dezenvolvimentu hosi Komunidade ASEAN nian, relasaun esterna sira ASEAN nian, dezenvolvimentu hosi Tratadu Amizade no Koperasaun iha Sudeste Aziátiku (TAC), no asuntu rejional sira ho internasionál sira ho interese mútuo.
Ajénsia Notisioza Indonézia, Antaranews ne’ebé TATOLI asesa ohin, katak ajenda prinsipál ida hosi sorumutu ne’e kona-ba adezaun Timor-Leste nian iha ASEAN tuir desizaun hosi Simeira ASEAN ba da-46.
Enkontru ne’e halo revizaun ba progresu preparasaun dokumentu adezaun nian, Timor-Leste nia partisipasaun iha instrumentu legál sira ASEAN nian, no prioridade sira ne’ebé sei rezolve hafoin adezaun formál.
Diskusaun ne’e hanesan parte ida husi preparasaun konjunta hodi simu Timor-Leste nu’udar membru plenu ASEAN nian iha Simeira ASEAN ba da-47 iha Kuala Lumpur iha Outubru 2025.
Notísia relevante: Parlamentu presiza aprova tratadu no akordu 60 ba adezaun Timor-Leste ba ASEAN
TATOLI
