Zé Pedro kontinua halo selesaun ba jogadór grupu daruak
DILI, 11 Setembru 2025 (TATOLI)—Treinadór Prinsipál Nasionál Futeból, Zé Pedro kontinua halo selesaun ba jogadór iha grupu daruak antes deside sai ekipa nasionál Timor-Leste.
Prosesu kontinuasaun selesaun ba jogadór grupu daruak nian hala’o hafoin ramata halo selesaun ba jogadór grupu dahuluk nian durante loron-neen, hahú 3-9 Setembru. Hafoin ne’e sei hili jogadór na’in-23 hodi prepara ba jogu Kualifikasaun Tasa Ázia AFC tinan 2027.
“Daudaun ne’e hala’o tan treinamentu selesaun ba grupu daruak ho ema na’in-hitu (7),” nia hateten iha nia kna’ar fatin, Kinta ne’e.
Notísia relevante: Zé Pedro hahú treina no halo selesaun ba ekipa nasionál
Iha faze selesaun ba jogadór grupu, implementa ho métudu treinu ne’ebé mós hanesan ho grupu dahuluk ho durasaun loron hitu, ne’ebé tuir planu sei ramata iha 15 Setembru iha Kampo KOICA, Kulau-Bekora, Dili.
Bainhira proseu selesaun ba grupu rua referida finaliza, ekipa treinadór sei halo konvokatóriu lista jogadór nasionál husi na’in-30 hodi diminui ba ekipa nasionál hamutuk jogadór na’in-23 hodi kontinua ba hala’o Training Camp (TC) iha Darwin-Austrália.
Entretantu, jogadór na’in-hitu ne’ebé koloka iha grupu daruak mak hanesan Nelson Viegas (Emanuel FC), Almerito da Silva (Ponta Leste), Jorge do Rosário (Dungannon Tigers FC), Ejivanio da Costa (Aitana FC), Tirjon Maia (Assalam FC), Totifanio Amaral (Karketu Dili FC) no Leonildo da Costa (Dungannon Tigers FC).
Jornalista: Natalino Belo
Editór: Xisto Freitas da Piedade
