DILI, 16 Setembru 2025 (TATOLI) – Governu liuhusi Ministériu Administrasaun Estatál (MAE), la prevé orsamentu ba kriasaun suku foun iha tinan-2026, tanba konsentra ba iha desentralizasaun no podér lokál.
“Agora planu Governu Konstitusionál IX ne’e nia ne’e foka ba desentralizasaun podér lokál. Entaun Governu deside la tau osan ba kriasaun suku foun. Ita foka avaliasaun kondisaun hodi hakat ba desentralizasaun no podér lokál iha tinan oin,” Diretór Jerál Desentralizasaun Governu Lokál iha MAE, António Guterres, dehan ba jornalista sira, iha salaun Delta Nova, Komoro, Dili, Tersa ne’e.
António rekorda, proposta sira-ne’e pendente no la finansia ona no planu atu hakat ba avaliasaun kondisaun mínima.
Notísia relevante:Desentralizasaun no podér lokál nu’udar misaun no obrigasaun konstitusionál
Ezekutivu ne’e dehan proposta harii suku foun hamutuk 50 mak tama, anteriór, no ida-ne’ebé lakonsidera ne’e 20-resin.
“Ita iha proposta hamutuk 70-resin, maibé ita hakarak hatene no hakarak hato’o ba públiku suku 452 nia subsídiu no señas prezensa ba membru eleitu lideransa komunitária sira ho nia funsionáriu na’in-haat ne’e de’it prevé millaun $12. Orsamentu ne’e tama iha kategória transferénsia públika,” nia akresenta.
Totál aldeia iha Timor-Leste hamutuk 2.233, suku hamutuk 452, Postu Administrativu iha 66 no munisípiu 13 inklui Rejiaun Administrativa Espesiál Oekusi Ambenu (RAEOA), maibé ida ne’e númeru jerál ne’ebé labele hetan ona atualizasaun ba tinan-2025.
Notísia relevante:MAE rejista proposta estabelese suku foun 40 iha territóriu nasionál
Jornalista: Osória Marques
Editór: Rafael Ximenes de A. Belo
