Labarik TL nia direitu ba kuidadu saúde ne’ebé seguru hahú husi moris
DILI, 22 setembru 2025 (TATOLI)–Reprezentante Organizasaun Mundiál Saúde (OMS) iha Timor-Leste, Arvind Mathur, hateten labarik Timor-Leste ninia direitu ba kuidadu saúde ne’ebé seguru hahú husi kedas labarik moris mai.
“Labarik sira la’ós adultu mak atu responde ba ai-moruk sira-ne’ebé presiza iha fasilidade sira maibe ekipamentu no atendimentu médiku ne’ebé amigavel ba labarik sira hahú sira moris mai,” Arvind Mathur haktuir liuhusi nota imprensa ne’ebé TATOLI asesu, ohin.
Nia hato’o, mensajen ne’e iha komemorasaun Loron Mundiál seguransa pasiente nian, ne’ebé mak selebra iha 17 fulan-Setembru kada tinan.
Tuir Arvind Mathur, globalmente pasiente ida husi pasiente 10 hetan prejuízu bainhira simu servisu kuidadu saúde nian, no risku sira boot liután ba bebé foin moris no labarik ki’ik sira.
OMS nota katak, iha nasaun sira ho rendimentu ki’ik no médiu to’o pasiente na’in-haat husi na’in-100 mate tanba kuidadu ne’ebé la seguru. Liu metade husi insidente sira-ne’e bele prevene, barak liu mak relasiona ho erru sira iha ai-moruk.
Tema Loron Mundiál seguransa pasiente nian ba tinan ida-ne’e mak “Seguransa Pasiente nian husi Inísiu”, sai hanesan lembransa ida katak proteje seguransa labarik nian tenke hahú husi moris to’o tinan sia (9), períodu krusiál ida hodi harii fundasaun ba sira-nia saúde no futuru.
Nia mós husu atu iha responsabilidade fahe malu hodi proteje labarik sira-nia seguransa no husu ba profisionál saúde sira atu aumenta adezaun ba protokolu seguransa nian, inan-aman sira atu sai membru ativu sira husi ekipa kuidadu nian no líder sira atu investe iha infraestrutura kuidadu saúde nian ne’ebé amigavel ba labarik sira.
“Ha’u nia vizaun mak inan hotu-hotu iha Timor-Leste bele entrega nia bebé ne’ebé moras ba profisionál saúde nian ho konfiansa katak sira sei hetan kuidadu ho seguru,” nia esplika.
Loron Mundiál seguransa pasiente nian estabelese husi Asembleia Mundiál Saúde nian iha tinan 2019 liuhosi rezolusaun WHA72.6 kona-ba asaun globál ba seguransa pasiente nian.
Observasaun ida-ne’e hakarak hasa’e konxiénsia, hametin envolvimentu komunidade nian no enkoraja asaun konkreta hodi prevene risku sira-ne’ebé bele evita iha setór kuidadu saúde nian.
TATOLI
