VIKEKE, 24 Setembru 2025 (TATOLI)—Komandante Autoridade Protesaun Sivíl (APC-sigla portugeza) Munisípiu Vikeke, Cirílio S. Gomes informa hahú husi fulan-Janeiru to’o fulan-Setembru 2025, APC Munisípiu Vikeke rejista ona uma-kain 175 afetadu ba akontesimentu dezastre naturál.
“Akontesimentu dezastre naturál ne’ebé akontese iha Munisípiu Vikeke husi fulan-Janeiru to’o Setembru ne’e ami rejista ona vítima afetada hamutuk uma-kain 175. Tipu dezastre kompostu husi anin sobu uma, ahi han uma no rai halai,” Cirílio ba TATOLI iha ninia kna’ar fatin, Sira-Lari, Kuarta ne’e.
Komandante APC ne’e haktuir vítima afetada dezastre naturál ne’e APC oferese apoia emerjénsia hanesan nesesidade bázika, maibé kona-ba rekuperasaun ne’e seidauk tanba dadus sira-ne’e APC haruka bá nasionál hodi halo aprovasaun.
Husi númeru 175 ne’e, nia esplika, APC ta’is uma-kain 117 mak merese simu apoiu materiál rekuperasaun, enkuantu uma-kain neen labele hetan materiál rekuperasaun tanba uma ne’ebé estragadu ne’e tipu dapur.
Entretantu, Cirílio dehan, dezafiu ne’ebé APC Vikeke enfrenta mak menus transporte no rekursu umanu ba atendementu komunidade afetadu dezastre naturál tanba Munisípiu Vikeke área luan, postu lima no suku 38,ne’ebé difísil atu kobre lalais.
“Pesoál APC ativu ih Munisípiu Vikeke hamutuk na’in-32 kompostu husi Bombeiru no Protesaun Sivíl, maibé ba atendementu jestaun dezastre no rekuperasaun ema na’in haat de’it, entaun ida-ne’e mak ami-nia dezafiu. Ami hakarak ne’e aumenta pesoál hodi koloka bá kada postu lima ne’e ema na’in-rua no aumenta transporte operasaun. Husi dezafiu sira-ne’e ami relata hotu ona bá nasionál, maibé seidauk iha resposta,” nia hato’o.
Tuir dadus, tipu dezastre naturál hanesan anin sobu uma hamutuk 164, ahi han uma 10, rai halai 1, nune’e fahe ba kategória aat totál 71, aat natoon 34 no aat kamaan 70.
Jornalista: Vitorino Lopez da Costa
Editór: Xisto Freitas da Piedade
