Governu aprova adezaun Timor-Leste nian ba OGP
DILI, 25 Setembru 2025 (TATOLI)—Governu liuhusi reuniaun Konsellu Ministru (KM), Kinta ne’e, aprova Projetu Rezolusaun Governu, ne’ebé aprezenta husi Ministra Finansa, Santina Cardoso, kona-ba Timor-Leste atu adere ba Parseria b Governu Abertu ka (OGP – Open Government Partnership).
“Parseria ba Governu abertu hanesan inisiativa internasionál ida, ne’ebé halibur país liu 75 no entidade governasaun lokál atus ba atus, ne’ebé atu promove transparénsia, prestasaun konta, inkluzaun no partisipasaun sidadaun nian iha prátika governasaun, hodi haburas sosiedade ida ne’ebé reziliénte no prósperu liután,” referidu nota ne’ebé Ajénsia TATOLI asesu hafoin reuniaun Ezekutivu, iha Palásiu Governu.
Timor-Leste ho adezaun ba inisiativa ida-ne’e, kompromete atu kumpre rekezitu, padraun no prátika internasionál sira ne’ebé di’ak, neʼebé estabelese husi parseria hodi hametin transparénsia, kombate korrupsaun no partisipasaun ativu husi sosiedade sivíl no parseiru sira seluk iha prosesu foti desizaun públika.
Notísia relevante : Governu lansa divulgasaun nasionál adezaun ba OMK iha nivel Munisípiu
Rezolusaun ne’e determina katak Ministériu Finansa (MF) asume lideransa iha prosesu adezaun no implementasaun Parséria ba Governu abertu, sai hanesan responsável atu hato’o formalmente dokumentu sira ne’ebé presiza, estabelese mekanizmu diálogu multisetoriál no koordena elaborasaun planu asaun nasionál Governu abertu nian, ho envolvimentu husi liña ministeriál no parseiru relevante sira.
MF tenke hato’o ba KM, iha prazu loron 90 hafoin publikasaun rezolusaun ida-ne’e, relatóriu preliminár ida kona-ba estatutu adezaun nian no pasu sira tuirmai hodi formula Planu Asaun.
Jornalista : Alexandra da Costa
Editora : Julia Chatarina
