DILI 25 Setembru 2025 (TATOLI)–Governu liuhusi reuniaun Konsellu Ministru (KM), Kinta ne’e, aprova proposta regulamentu lei nú. 3/2025, loron 23 Abríl, kona-ba Enkuadramentu Orsamentu Jerál Estadu (OJE) 2026 no Jestaun Finanseira Públika, ne’ebé aprezenta husi Ministra Finansa, Satina Cardoso.
Ministra Finansa, Santina Cardoso hateten, Ministériu Finansa (MF) iha semana kotuk halo ona aprezentasaun preliminár ba Lei Enkuadramentu Orsamentu no Jestaun Finanseira Públika.
“Lei ne’e regula kona-ba preparasaun planu orsamentu, ezekusaun nomós relatóriu ne’ebé tenke halo tuir prosesu ka mekanizmu ne’ebé iha ona. Tetu orsamentu ha’u seidauk lori mai tamba Primeiru-Ministru sei halo verifikasaun ba relatóriu,” Ministra informa ba Jornalista sira iha Palásiu Governu.
Notísia relevante : MF prepara livru anuál rezulatdu tetu OJE 2026 antes submete ba PM
Governante ne’e dehan, tuir lei loron 01 Outubru 2025 MF tenke lori Proposta Lei OJE 2026 ba Parlamentu Nasionál, tanba ne’e MF sei esforsu nune’e iha loron 29 ka 30 Setembru bele lori ba KM hodi halo aprovasaun.
Lei Enkuadramentu Orsamentu no Jestaun Finanseira Públika estabelese ho forma detallada no operasionál, regra no prosedimentu sira ne’ebé garante implementasaun tomak ba Lei Enkuadramentu foun, hodi reforsa prinsípiu transparénsia, disiplina orsamentál, responsabilizasaun no sustentabilidade fiskál nian.
Aleinde ne’e, inisiativa ne’e hanesan pasu desizivu ida hodi asegura katak rekursu públiku bele jere ho efisiénsia boot liu no ba benefísiu diretu populasaun nian.
“Dekretu-Lei ne’e introdús norma abranjente lubun ida-ne’ebé organiza no estrutura siklu orsamentál hotu, hahú husi planeamentu estratéjiku no partisipativu to’o ezekusaun, kontrolu no prestasaun kontas,” nota Ezekutivu esplika.
Entre inovasaun prinsipál sira maka regulamentasaun husi Deklarasaun estratéjia orsamentál, definisaun ba tetu despeza nian, fortalesimentu ba papél konsulta públika no jornada orsamentál, nomós adosaun husi sistema kontabilidade duplu – orsamentál no finanseiru – hodi promove rigór no konfiabilidade boot liu iha informasaun finanseira Estadu nian.
Nune’e, diploma ne’e regula mós autonomia finanseira husi entidade Administrasaun Indireta Estadu, prosedimentu ba ezekusaun despeza no reseita, nomós estabelese regra sira ne’ebé klaru ba mudansa orsamentál no utilizasaun hosi rezerva kontiniénsia.
Governu Konstitusionál IX reafirma ninia kompromisu ba governasaun ida-ne’ebé responsável, orienta ba rezultadu no dezenvolvimentu sustentável.
“Kuadru legál foun ne’e hametin mekanizmu kontrolu no prestasaun konta, promove partisipasaun sidadaun iha prosesu orsamentál nomós kria kondisaun institusionál no téknika sira-ne’ebé nesesáriu ba jestaun públika ida-neʼebé moderna no efikás, tuir prátika internasionál sira ne’ebé di’ak liu,” referidu nota husi Ezekutivu.
Jornalista : Alexandra da Costa
Editora : Julia Chatarina
