DILI, 25 Setembru 2025 (TATOLI) – Primeiru-Ministru Kay Rala Xanana Gusmão hamutuk ho Prezidente Repúblika José Ramos-Horta konkorda Parlamentu Nasionál (PN) halakon totál ba Lei Pensaun Vitalísia.
“Ha’u informa ba Prezidente katak agora kala diskute hela iha Parlamentu Nasionál kona-ba Lei Pensaun Vitalísia, ne’ebé diskute ba, ami na’in-rua (2) mós depende, ami na’in-rua (2) hamutuk dehan ko’a, ko’a-ba – ne’e depende. Se Lei fó ita simu. Se lei la fó ita la simu,” Xanana hateten ba jornalista sira iha Palásiu Prezidensiál Dili, kinta ne’e.
Notísia relevante:Bankada lima no EUTL asina akordu halakon Lei Pensaun Vitalísia, 25 Setembru debate
Xanana dehan, nia rasik mós to’o agora la hetan pensaun nu’udar Veteranu tanba nia rasik konsidera nia-aan la’ós Veteranu.
“Prezidente mós husu mai ha’u, ó hetan pensaun Veteranu nian? Ha’u hatan! Ha’u la hetan pensaun Veteranu tanba ha’u la’ós Veteranu, tanba atu sai Veteranu tenke hatama surat ba ida ne’ebá, ida ne’ebá, entaun ha’u hakarak simu la sai hanesan Veteranu,” Xanana tenik.
Enkuantu, kona-ba diskusaun iha Parlamentu Nasionál kona-ba halakon Lei Pensaun Mensál Vitalísia haka’at ona ba faze espesialidade ne’ebé sei halo diskusaun iha loron aban (26/09).
Diskusaun iha faze jeneralidade deputadu sira iha Parlamentu Nasionál konsege halo diskusaun no ikus avansa ba votasaun meiu aklamasaun afavór 61 kontra zero (0). no abstensaun zero (0).
Notísia relevante:https://tatoli.tl/2025/09/25/pn-aprova-ho-unanimidade-projetu-lei-revoga-pensaun-mensal-vitalisia-iha-jeneralidade/
Ho nune’e, Lei referida ultrapasa ba faze espesialidade hodi diskute no ikus avansa ba votasaun husi bankada Parlamentár sira bainhira konkorda hotu mak Lei ne’e sei lakon totál tuir proposta ne’ebé deputadu sira husi bankada sira aprezenta.
Notísia relevante:Sosiedade sivíl-akadémiku hato’o opiniaun kona-ba Revogasaun Lei Pensaun Vitalísia
Jornalista: Hortencio Sanchez
Editór: Rafael Ximenes de A. Belo
