ATAÚRU, 11 Outubru 2025 (TATOLI)–Primeiru-Ministru, Xanana Gusmão, Sábadu ne’e, lansa reabilitasaun estrada husi Suku Beloi to’o Suku Vila Maumeta, Ataúru, hodi fasilita komunidade nia movimentasaun.
Lansamentu reabilitasaun estrada ne’e akompaña husi Ministru Obra Públika, Samuel Marçal no Prezidente Autoridade Munisípiu Ataúru inklui autoridade lokál Ataúru.
Projetu ba reabilitasaun estrada ligasaun Beloi ba Suku Vila Maumeta ne’e kontrui husi empreza Tinolina Unipessoal, Lda ho durasaun tempu loron 365 ho montante orsamentu $3.250.843,98 ho númeru kontratu SSS/159/ MOP-2025.
Selebrasaun kontratu ba reabilitasaun estrada Beloi bá Suku Vila Maumeta ne’e asina direta husi Ministru Obra Públika ho Diretór Empreza Tinolina, Agostinho Gomes.
Iha deskursu, Primeiru-Ministru Xanana Gusmão husu ba empreza Tinolina atu halo projetu reabilitasaun estrada ne’e tenke garante kualidade.
“Husu ba kompañia ne’ebé kaer projetu ne’e tenke halo ho kualidade,” Xanana hateten iha nia intervensaun iha ambitu serimónia lansamentu estrada iha Ataúru.
Xefe Governu mós husu ba komunidade atu kolabora no koopera ho empreza nune’e bele aselera projetu ne’e para bele fasilita komunidade Ataúru nia movimentasaun hodi garante ekonomia di’ak.
Iha fatin hanesan, Ministru Oba Públika, Samuel Marçal hateten reabilitasaun estrada ne’e marka pasu pozitivu ida ba komunidade Ataúru tanba bele sente dezenvolvimentu ona.
“Ita hahú lansa ohin, ita espera katak tama natal no tinan foun, reabilitasaun estrada ida ohin ita lansa ne’e bele tau ona alkatraun. Husu ba povu Ataúru koopera no kolabora, labele atraza servisu ne’e,” nia fó-hanoin.
Aleinde ne’e, Prezidente Autoridade Munisípiu Ataúru, Mateus Belo agradese ba Governu tanba halo reabilitasaun ba estrada Ataúru.
Nia dehan, loron ohin nu’udár loron importante ba povu Ataúru tanba dezde Portugés nia tempu to’o mai Timor ukun aan Ataúru izoladu.
“Ha’u lori povu Ataúru halarak espresa sentimentu agradesimentu ba Governu ne’ebé bele lori dezenvolvimentu bá Ataúru,” nia agradese.
Entretantu, Diretór Empreza Tinolina Unipessoál Lda, Agostostinho Gomes promete sei halo projetu reabilitasaun estrada husi Beloi mai Vila Maumeta ho kualidade.
“Ha’u promete sei halo estrada ida-ne’e ho kualidade no sei termina tuir tempu iha kontratu,” nia tenik.
Jornalista: Natalino Costa
Editór: Xisto Freitas da Piedade
