DILI, 13 Outubru 2025 (TATOLI)—Pro-Reitór ba Asuntu Dezenvolvimentu Instituisionál, iha Universidade Nasionál Timor Lorosa’e (UNTL), Lelis Gonzaga Fraga, informa progresu konstrusaun edifísiu Institutu Nasionál Linguístika (INL) foin mak atinje 44%.
“Projetu INL nian ne’ebé konstrui iha Fakuldade Edukasaun, Arte no Umanidade nian ne’e, neste momentu foin mak atinje 44%. Tanba uma ne’e hamriik ona no monta hotu ona plaka, hein de’it parte laran no pinta no taka azuleju sira,” Pro-Reitór Lelis dehan ba TATOLI, iha resintu MESSK, Kolmera, Segunda ne’e.
Pro-Reitór dehan obra ne’e empreza Venture Feto Kaduak no Dwipongo Bee Feto Tata mak kaer, ne’ebé hahú iha Janeiru 2024 to’o Janeiru 2025. Projetu ne’e konstrui ho orsamentu rihun $768.
“Maibé, ho pursentu 44 ne’e, ami sempre aproxima ho empreza atu aselera projetu ne’e lalais tuir akordu ne’ebé ita fó ona. Tanba foin mak pursentu 44, entaun la garante ka sei la konsege finaliza iha tinan ida-ne’e,” nia esplika.
Edifísiu foun ne’e kompostu husi sala hamutuk 12 inklui auditóriu ida. Pizu dahuluk ne’e iha sala hamutuk ualu no pizu daruak ne’e iha sala haat, depoiz iha mós auditóriu boot ida.
Entretantu, Project Manager, Aji Ageng Riyadi hateten kontrusaun edifísiu la’o tarde tanba fatin atu rai sasán konstrusaun la sufisiente.
“Prosesu konstrusaun ne’e la’o tarde uitoan tanba espasu la sufisiente atu rai materiál konstrusaun nian, entaun ami tenke muda fatin atubele rai materiál sira nune’e ami bele serbisu lalais no daudaun ne’e ami kesi ona besi sinta nian, hein atu cor no nahe de’it ona. Ami mós sei esforsu atu serbisu hodibele ramata tuir termu kontratu ne’ebé iha ona,” nia tenik.
Jornalista: Osória Marques
Editór: Xisto Freitas da Piedade
