BOBONARU, 24 Outubru 2025 (TATOLI)-Diresaun Servisu Munisipál Seguransa Alimentár, Autoridade Munisípiu Bobonaru, serbisu hamutuk ho parseiru sira, komemora Loron Mundiál Ai-han ho realiza kompetisaun kulinária no sertame.
Diretór Servisu Munisipál Seguransa Alimentár munisíiu Bobonaro, Rui Manuel Lasi, dehan tuir lolos selebrasaun Loron Mundiál Ai-han ho tema “Nutrisaun no seguransa ai-han sai fundasaun ne’ebé rezilente ba future”, ne’e realiza iha 16 Outubru, maibé la konsege tanba Bobonaru iha hela atvidade boot ba komemorasaun loron trajedia Balibo Five ba da-50.
Nia dehan komemorasaun Loron Mundiál Ai-han ne’e nia objetivu prinsipál mak atu garante ema hotu-hotu nia direitu ba ai-han ne’ebé tenke saudavel, sufisiente no tenke iha kontinuasaun.
Nune’e, Bobonaru komemora data ne’e ho atvidade kompetisaun kulinária ho nia objetivu atu diversifika ai-han lokál, hodi garante labele iha ai-han importadu.
Aleinde ne’e realiza mós sertame ba estudante nivel ensinu báziku atu garante ba futuru alunu ne’ebé hanesan jerasaun foun tenke konsumu ai-han nutritivu no kualidade.
“Sertame ida-ne’e atu loke sira-nia hanoin, itelijénsia, nune’e muda sira-nia hahalok katak agora ita tenke uza ai-han nutritivu, ijiene, tanba durante ne’e ita hare oan sira han ai-han ne’ebé la seguru”, nia haktuir.
Iha komemorasaun ne’e, envolve mós ajente ekonómiku no produtór sira ne’ebé mai ho idaidak nia asaun.
“Agrikultór atu halo saida, sira atu hasa’e produsaun. Negosiante sira atu fa’an ai-han ne’ebé mak kualidade no nutritivu, depois loja-na’in sira ita envolve atu haree ai-han ne’ebé liu tiha ona prazu tenke halakon, tanba dalaruma ita la kontrola buat sira ne’e, entaun fa’an ai-han sira ne’ebé prazu ba komunidade ho folin ne’ebé ki’ik, bele estraga ema nia saúde”, nia afirma.
Prezidente Autoridade munisípiu Bobonaru, Paulo Moniz Maia, reforsa katak selebrasaun loron ne’e atu fó hanoin atu aloka rekursu ne’ebé natoon hodi hasa’e produsaun ai-han, hadi’ak kualidade ai-han, nune’e bele kontribui ba saúde ne’ebé di’ak. Aleinde ne’e, hadi’a nutrisaun labarik no ema adultu sira-nia no prevene problema krekas no raes-badak ne’ebé durante ne’e sai kestaun global, liuliu iha sudeste aziatiku.
Atu garante seguransa alimentár no redús problema má nutrisaun, Paulo Moniz Maia afirma katak autoridade Bobonaru inklui iha Planu Dezenvolvimentu Munisipál no Estratéjia sira nesesáriu atu hasa’e produsaun ai-han, liuhusi hadi’ak sistema irrigasaun, mellora mekanizmu kultivasaun, introdús ekipamentu modernu.
“Aliña ho Programa Merenda Eskolár, munisípiu Bobonaru presiza investe barak liu iha setór agrikultura, nune’e bele fornese ai-han ne’ebé saudavel ba ita-nia oan sira ne’ebé sai jerasaun futuru”, katak.
Antigu deputadu ne’e rekoñese katak Bobonaru nia kapasidade atu deteta matéria kímiku ne’ebé utiliza ba ai-han iha merkadu limitadu, tanba ne’e husu nafatin parte relevante sira atu haka’as-an hodi halo kontrolu másimu.
Totál orsamentu ne’ebé gasta ba komemorasaun data ne’e hamutuk $300 no orsamentu ne’e mai husi Autoridade Munisípiu Bobonaru.
Notisia relevante: Loron Mundiál Ai-han, Governu defende valorizasaun produtu lokál
Jornalista: Sergio da Cruz
Editora: Maria Auxiliadora
