BOBONARU, 27 Outubru 2025 (TATOLI) – Autoridade Bobonaru halo abertura ba taxa rotativa no taxa permanente Don Martinho Cup segunda faze, epoka 2025 nian, ne’ebé organiza husi Eskola Sekundária Jerál Públiku Don Martinho da Costa Lopes, Maliana.
Abertura ne’e halo husi Prezidente Autoridade Munisípiu Bobonaru, Paulo Moniz Maia, hamutuk ho Asosiasaun Futeból Bobonaru no Diresaun Servisu Munisipál Edukasaun.
Klubu ne’ebé kompete iha eventu ne’e hamutuk neen, ne’ebé mai husi Eskola Sekundária Jerál Don Martinho da Costa Lopes Maliana, Eskola Malibaka Yamato Maliana, Kristál, IT Maliana, Eskola Téknika Agríkola Moleanan no Eskola Filiál Don Martinho da Costa Lopes Balibo Five.
Prezidente Autoridade Bobonaru fiar katak ho eventu ne’e bele hetan fini jogadór di’ak hodi reprezenta munisípiu bá kompete iha eventu nasionál no internasionál.
“Bobonaru ne’e mesak jogadór de’it hahú 1990 ne’e joga di’ak iha momentu ne’ebá. Foin lalais ita bá joga iha Kovalima hetan primeiru lugar iha futeból, segunda lugar futsál nian. Modalidade seluk mós ita hetan. Kuaze taxa sira iha Kovalima ne’e ita raut hotu mai, tanba ne’e, iha eventu ida-ne’e hau espera ita bele fihir fini di’ak, nune’e loron ida nasionál presiza bá kompete”, dehan.
Prezidente Komisaun Organizadora, Juvenal dos Reis Pereira, dehan taxa rotativa ne’e realiza kada tinan dezde 2013. Eventu ne’e organiza atu komemora loron Padrueiru Don Martinho da Costa Lopes ho objetivu atu kria amizade, unidade no fraternidade entre joven sira iha Bobonaru. Aleinde ne’e atu buka mós fini jogadór foun munisípiu Bobonaru nia.
Notisía Relevante: Bispu Norberto husu estudante DMCL Maliana badinas estuda
“Dalabarak ita haree FFTL ho Asosiasaun Futeból selesiona jogadór sira ladún iha balansu. Tanba ne’e mak eskola Don Martinho hakarak kria jogu ida-ne’e atu buka fini ba jogador sira iha Bobonaru, nune’e ita bele hetan no hatene jogadór di’ak sira”, nia hateten iha intervensaun ba eventu ne’ebé realiza iha kampu Futeból Maliana, segunda-feira ne’e.
Reprezentante Diretor Edukasaun Munisipál Bobonaru, Noémia Antónia, apresia eskola nia inisiativa di’ak hodi realiza atividade estrakurrikulár ne’e.
“Aktividade ne’e lolos eskola hotu-hotu tenke halo depoizde prosesu aprendizajen. Ha’u-nia mensajen ba jogadór sira atu kria espíritu amizade entre eskola sira. Karik ita-boot sira iha problema uitoan entre eskola no eskola no indivíduu, maibé ho jogu ida-ne’e bele halakon tiha problema hirak ne’e”, katak.
Eventu ne’e hetan apoia fundu no materiál husi Ministériu Juventude, Desportu, Arte no Kultura, Ministeriu Edukasaun, inklui parseiru sira hanesan Telkomcel, empreza Hugo Amor no Sigo.
Prémiu ba kompetisaun taxa rotativa no permanente ba vensedór dahuluk sei hetan osan $250, segundu lugar $200, terseiru $150 no sei iha mós prémiu ba mellór ekipa no markadór.
Notísia relevante: Bobonaru komemora Loron Mundiál Ai-han ho kompetisaun kulinária no sertame
Jornalista: Sergio da Cruz
Editora: Maria Auxiliadora
