DILI, 28 Outubru 2025 (TATOLI)—Sentru Audivizuál Max Sthal Timor-Leste (CAMSTL, sigla portugés) realiza espozisaun ho forma fotográfia no video hodi komemora loron trajédia masakre Santa Krús 12 Novembru ba da-34 ho tema “Husi Trajédia ba Esperansa Tinan 34 Viajen Nasaun nian no Santa Krús 1991: Kanek Tuan, Espiritu Foun”.
Notísia Relevante: Max Stahl: Ha’u Dedika Filme Masakre Santa Cruz Ne’e Ba Mestre Tomas “Belir” Ximenes
Diretór Sentru Audivizuál Max Sthal, Eudicitio Pinto, hateten objetivu halo espozisaun ne’e hodi fó onra ba martír sira-ne’ebé fó sira-nia vida ba rai ida-ne’e, liuliu iha akontesementu masakre Santa Krús nian iha tinan 1991, nune’e iha selebrasaun loron ida-ne’e reprezenta martír sira hotu.
“Espozisaun sira-ne’e uza imajen istórika sira-ne’ebé Max Stahl hasai iha momentu pasadu atu kontinua prezerva no valoriza martír sira-nia luta,” Diretór ne’e informa ba jornalista sira iha nia kna’ar fatin, Formosa, ohin.
Husi espozisaun ida-ne’e sira mós hakarak loke espasu diálogu entre jerasaun tuan ho jerasaun foun, signifika durante espozisaun sei iha aprezentasaun husi sobrevivente martír sira-nian ba estudante sira atu hatene istória pasada.
Tamba, loron masakre Santa Krús ne’e importante tebes ba timoroan tomak no loron ne’e konsidera hanesan janela tanba ema hotu koñeseTtimor ne’e liuhusi loron ida-ne’e no esforau jornalista Max Stahl nian hodi konta ka halo sensibilizasaun istóriku ida-ne’e ba mundu tomak.
“Atividade ne’e ami hetan apoiu husi Gabinete Apoiu sosiedade Sivíl nian, maibe kona-ba orsamentu ha’u ladun haten,e sira parte administrasaun finansa mak hatene,” nia dehan.
Adjuntu Komité 12 Novembru, Jaime Francisco Fátima de Jesus Soares, hateten atividade ida ohin ne’e CAMSTL halo espozisaun ba obra fotográfia, videográfia kona-ba 12 Novembru nian, ba obrevivente sira-ne’ebé mate ona ho sira-nia ruin durante tinan hirak liubá, balun hetan ona no balun seidauk rekolla.
“Tanba ne’e, preparasaun ba loron 12 Novembru hanesan tinan-tinan halo ne’e, ami-nia oan sira mak halo. Tanba ami nia oan sira iha organizasaun hanaran jerasaun 12 Novembru, sira servisu em parseria ho Ministéria Joventude Desportu Arte no Kultura (MJDK), lada tinan sira mak organiza eventu 12 Novembru nian ne’e,” nia hateten.
Enkuantu atividade ne’e hetan apoiu husi Gabinete Apoiu Sosiedade Sivíl (GASC) no atividade espozisaun hahú abertura iha segunda (28 Outubru 2025) no sei taka iha loron 12 fulan-Novembru 2025.
Notísia Relevante: Militár Sira Lori Karreta “HINO” Sama-Mate Vítima Masakre Santa Cruz
Jornalista : Alexandra da Costa
Editór : Cancio Ximenes
