Ekipa Feto Ermera sei kontra Aileu iha finál Kopa Juvenil Sub-17
DILI, 28 Outubru 2025 (TATOLI)—Ekipa Feto Asosiasaun Futeból Munisipál Ermera (AFME) sei kontra Asosiasaun Futeból Munisipál Aileu (AFMA) hafoin manán Asosiasaun Dili Leste ho skor 4-1 iha kompetisaun Kopa Juvenil Sub-17 feto.
Ekipa Ermera susesu hakat to’o finál hafoin iha meiu finál kontra Dili Leste gaña 4-1, ne’ebé hala’o iha Estádiu Munisipál Dili, Tersa (28/10/2025).
Jogu entre ekipa Ermera no Dili Leste impata 1-1 iha parte dahuluk bainhira jogadora Ermera, Rivania Neno enxe golu iha minutu 30, maibé Dili Leste konsege responde iha minutu 31 liuhosi Sara Silva.
Notísia relevante: Ekipa feto husi Aileu hakat bá finál Kopa Juvenil Sub-17
Ermera ne’ebé maioria jogadora iha fíziku altura domina kampu nune’e jogu iha parte daruak lori rezultadu vitória hafoin golu tolu prodús liuhosi jogadóra hanesan Mizia Valadares iha minutu 57, Idelcia Silva 58 no Livania Neno iha minutu ikus 79.
Ho rezultadu jogu entre ekipa rua, Ermera sei kontra Aileu iha finál, enkuantu Asosiasaun Futeból Dili Leste sei hasoru Asosiasaun Futeból Munisipál Baukau (AFMB) hodi hadau terseiru lugár.
Jornalista: Natalino Belo
Editór: Xisto Freitas da Piedade
