Ekipa futeból mane husi Manufahi hakat bá finál Kopa Juveníl Sub-17
DILI, 29 Outubru 2025 (TATOLI)–Ekipa Futeból husi Asosiasaun Munisípiu Manufahi hakat bá finál Kopa Juveníl Sub-17 hafoin halakon Asosiasaun Futeból Munisipál Vikeke ho skor 2-3 iha Estádiu Munisipál Dili, Kuarta ne’e.
Ekipa Same gaña tikete finál kompetisaun entre munisípiu ne’e hafoin rezultadu hatudu 2-3. Antes ne’e, ekipa husi Vikeke lidera uluk 2-1 to’o minutu 70.
Jogu iha parte dahuluk tabela skor impata 1-1 iha-ne’ebé Vikeke lidera uluk golu liuhusi jogadór Nikson Ximenes iha minutu 11 hafoin aproveita fallansu husi jogadór Manufahi iha grandeia.
Mezmu nune’e, ekipa Manufahi konsege responde hikas golu liuhosi jogadór Protazio Cunha iha minutu 37 bainhira aproveita xuta bola falta ne’ebé rezulta tabela skor empata 1-1 iha parte dahuluk.
Notísia relevante: Ohin Kopa Juvenil Sub-17 hahú tama faze meiu finál
Iha parte daruak, Vikeke inisia uluk atake no lidera hikas tabela skor 2-1 liuhosi jogadór Manuel Barreto iha minutu 64, maibé ekipa Manufahi konsege responde hikas golu rua no sai vensedór liuhosi jogadór Manuel Silva iha minutu 70 no 73.
Nune’e, ho rezultadu jogu referidu, ekipa futeból Manufahi hakat bá finál hodi hein ekipa husi Asosiasaun Futeból Ermera kontra Dili Leste.
Jornalista: Natalino Belo
Editór: Xisto Freitas da Piedade
