ABC Austrália entrega ekipamentu Mobile Journalism ba TATOLI
DILI, 30 Outubru 2025 (TATOLI)–Reprezentante Australian Broadcasting Corporation (ABC) Australia, Julie Hornsey, kinta ne’e, entrega ekipamentu Mobile Journalism (Mojo) rua (2) ba Prezidente Agência TATOLI, I.P, Noemio Falcão, hodi bele fasilita jornalista sira hala’o kna’ar jornalístiku nian kada loron.
Notísia Relevante: ABC ID reforsa kapasitasaun jornalista Tatoli iha Storytelling no Mobile Journalism
Ekipamentu rua (2) ne’e kompostu husi tripot rua (2), telemovel ho marka Iphone 16 Pro Max rua no ekipamentu seluk tan ne’ebé kompleta ho pasta.
“Agradese ba ABC bele apoiu ona ami ho ekipamentu Mojo rua (2) ba TATOLI. Husu ba ekipa sira kuidadu didi’ak ekipamentu hirak ne’e,” Prezidente TATOLI, Noemio Falcão, hateten iha serimónia entrega ekipamentu Mojo iha edifisiu TATOLI, Faról, kinta ne’e.
Ekipamentu hirak ne’e kobre de’it ba notisia video ne’ebé ho durasaun minutu ida (1) mai kraik ne’ebé bele akomula istória hotu husi notisia ida (1) ho fonte rua ba leten.
Reprejentante Australian Broadcasting Corporation (ABC) Australia, Julie Hornsey, sente kontente bele hasoru malu ho ekipa TATOLI hodi entrega ekipamentu hirak ne’e.
“Ekipamentu mak ne’e, kuidadu halo didi’ak. Ekipamentu hirak ne’e atu TATOLI bele utiliza ba kobertura notisia video kada loron,” Julie hateten.
Julie hatutan, ekipamentu hirak ne’e sensitivu tebes no tenke rai iha fatin propriu no tenke karega hela de’it bainhira ramata halo servisu iha terrenu.
Notísia Relevante: Prezensa ABC iha TL impulsiona kreximentu no profesionalizmu jornalista lokál
Jornalista : Hortencio Sanchez
Editór : Cancio Ximenes
