Prezensa ABC iha TL impulsiona kreximentu no profesionalizmu jornalista lokál
BOBONARU, 15 outubru 2025 (TATOLI) – Radiodifuzaun públika Austrália nian, ABC (Australian Broadcasting Corporation), kontinua hametin nia knaar hodi apoia kreximentu mídia no hasa’e profisionalizmu jornalista sira-nian iha Timor-Leste liuhusi programa formasaun oioin, parseria, no kolaborasaun ho mídia nasionál no komunidade lokál sira.
Xefe Servisu Internasionál ABC nian, Claire Gorman, subliña kompromisiu ABC nian hodi fó apoiu ba mídia sira iha rejiaun Pasífiku no Timor-Leste hanesan parte ida husi responsabilidade públika hodi hametin demokrasia liuhusi mídia sira ne’ebé forte no independente.
“Hanesan emisora públika ne’ebé boot liu iha rejiaun, ABC sente iha responsabilidade hodi fó apoiu ba meiu komunikasaun sosiál sira seluk iha Pasífiku no Timor-Leste. Ami haka’as aan atu jornalista sira hetan formasaun ne’ebé adekuadu no katak meiu komunikasaun sosiál sira iha kapasidade hodi hala’o sira nia knaar,” Claire esplika iha entrevista eskluzivu TATOLI iha Balibo, kuarta ne’e.
Nia hatutan tan katak parseria ho mídia iha Timor-Leste hala’o ho baze ida ne’ebé hanesan no respeita malu, hodi rona nesesidade no kontestu lokál sira.
“Ami la mai ho ami-nia ajenda rasik, maibé atu servisu hamutuk no aprende husi esperiénsia mídia Timor-Leste nian,” nia hateten.
ABC hahú implementa ho ativu programa sira kooperasaun mídia nian iha Timor-Leste iha tinan-2023, hafoin diskusaun inisiál sira ho Governu Austrália no parseiru lokál sira iha tinan anteriór.
Foku husi kolaborasaun ne’e inklui formasaun iha jornalizmu investigativu, lideransa mídia, kapasitasaun redasaun, no apoiu tékniku ba mídia nasionál sira hanesan RTTL, TATOLI, no estasaun rádiu komunitária Rádiu Balibo.
Claire esplika katak ABC ajuda RTTL lansa ninia programa notísia iha lian Inglés, ne’ebé oras ne’e fó sai semana ida dala rua, no fó apoiu ba TATOLI hodi dezenvolve ninia plataforma dijitál.
“Ami mós fó formasaun ba jornalista joven sira iha Rádiu Balibo, inklui liuhusi formasaun fundamentál jornalizmu ne’ebé foin konklui iha Balibo,” nia akresenta.
Alende serbisu ho RTTL no TATOLI, ABC mós kolabora besik ho Konsellu Imprensa Timor-Leste, GMN, no mídia komunitária oioin.
Nia subliña katak kolaborasaun ida-ne’e inkluzivu no nakloke ba organizasaun mídia hotu-hotu, la haree ba medida.
“Ami hakarak mídia hotu-hotu atu buras hamutuk. Ami-nia formasaun dezeña atu nune’e formadór lokál sira bele kontinua dezenvolve sira-nia abilidade ho independente hafoin programa ne’e ramata,” nia hatete.
Programa formasaun ABC nian foka ba sustentabilidade no hametin valór sira jornalizmu étika nian. Gorman subliña katak relatóriu ne’ebé loos no ekilibradu maka fundasaun krusiál ba demokrasia.
“Ami nia objetivu maka ajuda mídia sira hodi kumpri nia papél demokrátiku, investiga kestaun sira interrese públiku nian no fornese informasaun sira ne’ebé ekilibradu,” nia esplika.
Alende kobertura notísia prinsipál, ABC mós apoia kobertura desportu no divertimentu ne’ebé promove inkluzaun sosiál, hanesan destaka realizasaun sira husi feto no ema ho defisiénsia sira iha desportu.
Kolaborasaun estratéjiku ho TATOLI
Destaka kolaborasaun ho TATOLI, Claire mensiona katak organizasaun rua ne’e dezenvolve hela Nota Intendimentu (MoU) ba kooperasaun longu-prazu iha formasaun jornalizmu no troka konteúdu.
ABC mós sei fornese formasaun jornalizmu móvel (MoJo) ba jornalista TATOLI, kompleta ho pakote ekipamentu reportajen rua no formasaun kona-ba kriasaun konteúdu vizuál ba plataforma dijitál sira.
“TATOLI iha potensiál maka’as tanba prodús notísia sira iha lian haat. Ne’e loke oportunidade sira ba troka konteúdu transfronteirisu sira, inklui ho audiénsia sira iha Austrália,” nia hateten.
Tuir Gorman, ABC nia prezensa iha Timor-Leste la’ós de’it forma ida apoiu tékniku nian, maibé mós kompromisu ida ba tempu naruk hodi harii jornalizmu profisionál, independente ne’ebé iha abut iha valór lokál sira.
Notisia relevante:Claire: Balibo Five fó hanoin kona-ba importánsia ba seguransa jornalista
Jornalista:Sergio da Cruz
Editór: Rafael Ximenes de A. Belo
