DILI, 30 Outubru 2025 (TATOLI)–Komandu Jerál Polísia Nasionál Timor-Leste (PNTL) liuhusi husi reuniaun Konsellu Superiór Polísia (KSP) iha fulan oin sei foti desizaun kona-ba membru Polísia ne’ebé antes ne’e fasilita arma ba xineza ida treinu tiru iha área Kaitehu, Munisípiu Likisá, iha loron 15 Setembru.
“Prosesu investigasaun la’o hela, membru ne’e daudaun iha hela suspensaun preventiva, atu nune’e parte Diresaun Disiplinár Justisa bele kompleta ninia prosesu tomak, depois aprezenta bá Komandu. Ita sei diskute asuntu ne’e iha enkontru Konsellu Superiór Polísia iha fulan oin. Ita sei deside kona-ba ninia futuru, bazeia ba faktus ne’ebé Diresaun Disiplinár no Justisa aprezenta,” Komandante Jerál PNTL, Komisáriu Polísia Henrique da Costa hateten ba Jornalista sira, iha Unidade Espesiál Polísia (EUP), Bairru Pité, Kinta ne’e.
Nune’e, Komisáriu Polísia lakohi pronúnsia katak membru ninia aktu ne’e grave ka lae tanba iha hela prosesu investigasaun.
“Rezultadu investigasaun mak sei komprova katak membru ne’e nia hahalok ne’e kategoria grave ka lae. Mas hakarak hateten katak armas Estadu ninian, sé entrega ba ha’u, ha’u mak bele uza. Sé entrega ba ita-nia membru ne’e, nia maka bele uza,” nia akresenta.
Notísia relevante : Komandu PNTL submete ba MP kazu membru fó arma ba xineza
Nia konsidera bainhira membru ida fó arma ba fali ema sivíl uza tiru halimar ne’e hanesan aktu irresponsabilidade.
“Ne’e signifika katak nia laiha responsablidade, entrega filafali sasán ne’e ba filafali ema seluk ne’ebé la’ós tan nia kolega no ba tan ema sivíl, mais piór liután ema estrajeiru,” nia lamenta.
Komandante Jerál subliña, regra ba kontrolu arma no jere arma ne’e tenke tuir lei orgánika PNTL, ne’ebé membru de’it mak bele uza arma.
“Sim, ita-nia regra rasik kona-ba jere arma ne’e klaru, tanba ne’e maka ita uza mós ida para atu investiga ba ita-nia membru sira. Kuandu iha ona regra, mas tanba saida mak ó la halo tuir regra ne’ebé mak iha,” Komisáriu Polísia hato’o.
Jornalista : Natalino Costa
Editora : Julia Chatarina
