Lansa ona primeira pedra ba sentru modernizasaun administrativa
DILI, 04 Novembru 2025 (TATOLI)—Ministériu Administrasaun Estatál (MAE) ho parseiru dezenvolvimentu, Tersa ne’e, lansa ona primeira pedra ba sentru modernizasaun administrativa hodi hadi’a servisu administrasaun públika sai kualidade.
Ministru Adminitrasaun Estatál, Tomás do Rosário Cabral hateten sentru ne’e nia funsaun atu rai dadus sira husi munisípiu sira hotu iha fatin-ne’e.
“Sentru ne’e Governu Sentrál ninian tanba ita hanoin atu iha podér lokál maibé iha mós balkaun úniku entaun kria sentru ida-ne’e atu halo sinkronizasaun dadus ne’e mai iha sentru, tanba ita tama ona ba ASEAN. Nasaun sira-ne’ebé mak hakarak investe bele peskiza kona-ba ema hira iha munisípiu liuhosi perfíl munisípiu nian,” Ministru dehan ba jornalista sira iha resintu MAE, Kolmera, Dili.
Govenante ne’e haktuir katak sentru modernizasaun administrativa ne’e sai hanesan sentru formasaun ba lian portugés.
“Tamba ita mós iha akordu ida ho Instituto Camões hodi loke formasaun lian portugés ba funsionáriu sira no sira mós bele halo online atu nune’e funsionáriu administrasaun iha munisípiu sira bele tuir,” Cabral dehan.
Iha fatin hanesan, Diretora Jerál Simplifikasaun no Modernalizasaun Administrativa, Maria Goretti Marques Belo, informa modernalizasaun administrativa ne’e nu’udár tékniku institusionál ida atu promove simplifikasaun, inovasaun no fortalesimentu Governu lokál.
“Sentru ida-ne’e mós hanesan pasu ida-ne’ebé dedikadu ba formasaun lian portugés ba funsionáriu administrasaun sira no mós sai hanesan sentru ne’ebé apoiu Ministériu Administrasaun Estatál atu hadi’a efisiénsia no efikásia iha prosesu desentralizasaun,” Goretti dehan.
Marques esplika iha kontesu modernizasaun mak Ministériu Administrasaun Estatál hahú ho balkaun úniku tanba nia servisu hanesan deskonstralizadu ida.
Nia akresenta integrasaun balkaun úniku nian iha Sentru Modernizasaun Administrasaun sei permite inovasaun no padroniza prosedimentu sira hodi fortaleza kapasidade lokál atu halo adaptasaun ba nesesidade povu nian.
Jornalista: Osória Marques
Editór: Xisto Freitas da Piedade
