VIKEKE, 12 Novembru 2025 (TATOLI)–Majór Jenerál FALINTIL-Forsa Defeza Timor-Leste (F-FDTL), Américo Ximenes ‘Sabika Besi Kulit’, hateten akontesimentu Masakre Santa Krús iha 12 Novembru 1991 loke mundu nian matan kona-ba funu iha Timor.
“Akontesimentu ne’e hetan kobertura husi jornalista estranjeiru mak lori sai bá mundu hodi konvense mundu. Hafoin ne’e mundu rekoñese problema Timor no ikus lori ita sai nasaun independente ida,” Sabika hateten iha ámbitu selebrasaun Masakre Santa Krús ba da-34, iha Suku Makadike de Cima, Postu Administrativu Uatulari, Munisípiu Vikeke, Kuarta ne’e.
Maski nune’e, nia haktuir, dalabarak ema hatene liu mak Masakre Santa Krús maibé iha Timor ne’e masakre akontese iha fatin oioin hanesan iha Kraras, Suku Bibileo, Postu Vikeke Vila, Masakre Muapitine, Lautein, Masakre Tumin, Oekusi, no fatin seluk tan.
“Ita Timor tantu loromonu no lorosa’e laiha ida mak la sofre ba konsekuénsia funu. Kuaze hotu-hotu terus ba funu,” Sabika subliña.
Nia hateten ohin loron Timor independente ona, tan ne’e joven sira tenke estuda tanba ho matenek mak foin bele muda nasaun nia vida.
Iha fatin hanesan, ex-Administradór Postu Uatulari, Manuel do Rosário haktuir kada tinan Postu Administrativu Uatulari sempre tau importánsia ba loron istóriku sira hanesan Masakre 12 Novembru 1991, tanba loke komunidade internasionál nia matan katak Timor iha funu hodi defende ninia independénsia.
“Funu ita hetan terus, hafoin nakfilak ba di’ak. Tan ne’e, Uatulari-oan tenke hamutuk hodi simu dezenvolvimentu, tantu Governu ne’ebé mak lori dezenvolvimentu mai rai Uatulari ita simu hodi kontribui ba dezenvolvimentu,” nia hato’o.
Hafoin serimónia selebrasaun ne’e, populasaun no autoridade Postu Uatulari kontinua lori ai-funan no lilin bá kari no sunu iha krús boot.
Serimónia ne’e partisipa husi populasaun, estudante, Administradór Postu Uatulari, xefe suku no konsellu suku sira.
Jornalista: Vitorino Lopes da Costa
Editór: Xisto Freitas da Piedade
