DILI, 12 Novembru 2025 (TATOLI) – Eis-Primeiru-Ministru, Taur Matan Ruak, husu ba joven sira atu komunga tuir valór juventude uluk ne’ebé husik hela liuhusi brani hakilar ba ukun rasik-an.
Eis-Prezidente Repúblika ne’e hato’o nia mesajen iha ámbitu selebrasaun tinan 34 Masakre Santa Krús (12 Novembru 1991- 12 Novembru 2025) no Loron Nasionál Juventude ba da-20, katak ohin mak loron importante tebes iha Timor-Leste nia istória luta ba libertasaun nasionál.
Nia haktuir, iha tinan 34 liubá, juventude loriku asu’ain ho determinasaun tomak husi espíritu luta ba ukun rasik-an nian, oferese an hakilar ba mundu tomak, katak Timor-Leste mate ka moris ukun rasik-an.
“Iha okaziaun ne’e, Timor-Leste komemora mós hanesan Loron Nasionál Juventude nian. Ha’u hanesan líder ida, hakarak konvida juventude hothotu atu hamutuk reflete ho profundidade kona-ba ezemplu eroizmu ne’ebé juventude sira uluk husik hela. Sira hatudu ba ita kona-ba domin, sakrifísiu, responsabilidade no dame ba rai doben Timor-Leste. Mártir sira husi Santa Krús no erói sira seluk mate, atu ita bele hetan ukun rasik-an. Sira sakrifíka moris, atu ita bele moris iha dame, hamutuk hadomi no hadi’a ita-nia nasaun ne’ebé ita hotu hadomi”, Taur Matan Ruak afirma.
Nia husu ba joven ohin loron nian tenke komunga valór sira ne’ebé juventude sira uluk defende iha loron 12 Novembru 1991.
“Ha’u apela ba imi hotu, aproveita imi-nia tempu joven hodi esforsu an estuda, estuda no estuda, tanba Timor-Leste presiza joven matenek atu muda rai ida ne’e tanba futuru Timor-Leste iha imi-nia liman. Ha’u konvida imi atu ita reflete hamutuk liafuan famozu ida dehan: “Saida mak ha’u bele halo, no saida mak ha’u bele fó ba ha’u-nia nasaun?”, nia hateten.
Hodi dehan nasaun sei hasoru dezafiu oioin, maibé ne’e la’ós obstákulu, bainhira haree esperiénsia husi nasaun sira ne’ebé independente ona iha tinan barak, hanesan timoroan hothotu tenke orgullu, katak Timor-Leste la’ós nasaun ida ne’ebé di’ak liu iha mundu, maibé mós la’ós nasaun ida ne’ebé aat liu.
“Ikus hakarak apela ba timoroan tomak, liuliu ba juventude, kontinua kontribui ba dame no estabilidade atu ita-nia rai sagrada ne’ebé ita hotu hadomi ne’e loron ida bele sai nasaun ida moderna, próspera no iha fatin ba timoroan hotu”, nia konklui.
Notísia relevante: Xanana: Masakre Santa Krús hanorin katak ba interese nasionál presiza la’o hamutuk
TATOLI
